蔡神仙上周末被大摩追到氣咳，後者一日內四喜臨門，反之蔡約翰僅得一W，即是四對一，目前大摩只距離榜首的蔡約翰五場頭馬，若連同今日共餘下九個賽馬天，如果大摩每次多贏蔡神仙一場，經已趕得及季尾反擒蔡約翰，不過，蔡約翰亦非坐以待斃，今日所派四隻泥地戰馬，隻隻有狀態，當然水準去到邊，只有馬房班手足最清楚，據馬房班手足指出，蔡神仙賽前安排呢四隻戰馬到醫生房照鼻兼抽血色素，所抽取得的血色素能反映出馬匹埋門戰鬥水準數值，最高分的有「平海飛星」及「精算閃擊」，至於「架勢」及「八心之友」嘅血色指數亦都唔錯，有本錢入三甲，但並非到達托弗的一類。
而呢四匹蔡廄戰馬，倉主今次有個特別安排，便是安排在賽日早上帶三駒到游水池游水一圈，保持正常的運動量，以往夜賽多數在谷中舉行，倉內戰馬要一早坐運馬車出市區，所以多數唔能夠作最後衝刺備戰，最多也只是在地堂踱十餘分鐘便上運馬車，今次四匹戰駒可以游水完畢，尚可返回馬房稍作小休，等待晚間才上陣，形勢是較有利。蔡約翰馬房手足亦透露，過往也有不少搏馬成功例子，晚上或午間搏馬，早上也有安排游水活動的。
熙仔做足功課搏殺
蔡約翰今次一手戰馬實力不俗外，徒弟羅富全的參戰馬實力亦強，當中交由陳嘉熙上陣的「星叻」及「地大大」，屬備戰最積極的兩駒，以上個禮拜的操練工序為例，逢星期一、三及五，即隔日便見這對馬仿似孖公仔般到機坪踱步，兩駒踱來火猛力足，鞍上人都要抽緊韁繩才能控制穩妥，而受任命替這兩駒搏殺的陳嘉熙，他亦指出會好好珍惜機會，因此，他近日一收工便返回宿舍睇片，並分析同場假想敵的跑法，正所謂知己知彼百戰百勝，睇呢位見習生如此認真，相信呢兩隻實力馬屆時亦唔會令人失望。
石哥監督三駒換甲
跑泥地戰，羅富全勝出率最高外，第二個倉勝出率高就係徐雨石，今次呢個倉有三匹戰馬倉主是非常緊張，最後試跑朝即周一，倉主遲遲不肯離開馬房，原來是等睇三匹戰馬換出賽用的銻甲，呢三隻戰馬分別是「天賜寶」、「豹子頭」及「旋里多彩」，當三駒換完銻甲後，倉主命工作人員拖馬給他過目，即每匹馬拖前走十步，再轉身拖十步，細心觀察三駒換上銻甲後會否走得暢順，遇有特別走得不順情況，便要釘甲師傅立刻修正，尚幸三匹戰馬換銻甲後步姿都非常暢順，倉主才放心離開馬房。
徐雨石親自督釘甲的三匹參戰馬之中，倉主最緊張的都是「旋里多彩」，因為呢隻馬仲未交出頭馬，呢個當然屬緊張原因之一，原因之二，就係呢匹係由倉主替馬主入貨，所以對倉主來講壓力都咪話唔大。上次潘頓替呢隻馬初跑泥戰即入位，今次再吼番泥地短途列陣，且一早卜番潘頓跑，種種動態都話俾大家聽，三隻徐雨石列陣馬中，雖然三隻都搏命，但倉主一定希望「旋里多彩」能夠及早交出頭馬，紓緩一下心中壓力，戰意不用懷疑。