服務社區就未見泛暴派有咩新招數，在為自己抽水謀福利方面，佢哋就真係「創意無窮」。煽暴派候任沙田錦濤區區議員許立燊仲未上任就政治分贓，為自己友謀咗一份「職」叫做「區副議員」，呢單嘢近日就被人踢爆，連佢哋自己友獨立媒體都質疑佢哋有「冒認公職人員」之嫌。而呢位「副議員」蘇艷梨就夾硬咁解釋「呢個係我哋競選『承諾』」云云，更扮晒嘢話「由於很多累積的地區問題要處理，所以希望我以副議員身分（份）高度參與協助許立燊同服務居民」云云，但面對鋪天蓋地嘅質疑，最終佢都係放棄呢個「承諾」，但就畀咗自己一個新title（職銜），真係為區議會帶來「新氣象」呢！
許立燊新「官」尚未上任，就僭建咗一個所謂「候任錦濤區副議員」嘅美差，但把「火」就燒到自己。該「副議員」蘇艷梨日前就喺「獨媒」同埋facebook被人圍攻。本來蘇艷梨喺「獨媒」就聲稱「區副議員」稱呼，是與「錦濤」候任區議員許立燊在競選時的共識，以傳達「選一個等於撐兩個」訊息，並非巧立名目云云。
話係「選舉承諾」 跪低改叫總幹事
網友各個亦都搲晒頭，質問佢：「咩係區副議員？你哋呢區特別啲？」蘇艷梨就為自己辯解，「呢個係我哋競選『承諾』，選一個但兩個人全職服務」，又扮晒嘢話：「由於很多累積的地區問題要處理，所以希望我以『副議員』身分（份）高度參與協助許立燊同服務居民。」
不過唔知點解，呢句說話講咗冇幾耐，蘇艷梨就放棄咗個「承諾」，喺facebook宣佈棄用「區副議員」稱呼，改稱「馬鞍山地區總幹事」。
佢話自己在競選時就與許立燊「破天荒二人同行參選」，更稱曾承諾「當選後以『正、副議員』身份服務行（街）坊，亦於入屋郵遞的單張中寫下此承諾」，因此許立燊當選後，成為候任沙田區議員，「而沙沙（蘇）則順理成章成為『錦濤區』的副議員（非沙田區議會）」、「這亦是立燊對沙沙的尊重，因為他視我為工作上的拍檔，而非助手（很感動）。」
假冒公職人員 最高囚6個月
前句剛話「副議員」係一個對佢如此重要、代表「尊重」嘅「尊稱」，轉頭佢又話「是否『區副議員』都是一個虛名」，但蘇艷梨就深得拍檔許立燊嘅真傳，非常善於玩「title」，佢就話「如果一個『名』既然會引起各方疑慮、甚至我會負上刑責，那麼要『改名』又不是甚（什）麼大事件，所以我而（𠵱）家有新title『馬鞍山地區總幹事』。」
根據香港法例第二百二十八章 《簡易程序治罪條例》，訂明「任何人藉任何作為或不作為假冒公職人員，或假裝能促致公職人員作出或不作出與其職責有關的任何作為或事情，不論是否意圖取得任何有價值的東西，均可處罰款1,000元或監禁6個月」。 ■香港文匯報記者 文根茂、黃書蘭