■網民播歪理鬧爆派口罩者，更開名鬧埋杜汶澤。攬炒派諗嘢個腦迴路真係同一般人好唔同。今時今日正常人都守望相助，幫手撲口罩，同心抗疫，最多政治上腦啲嘅，就叫「藍絲」唔好買「黃絲」搵返嚟嘅口罩，點知原來攬炒派係覺得任何人都唔應該派口罩，因為要咁樣先會令到佢哋嬲政府喎。有攬炒派仲喺「連登」網上討論區度點名「港獨」藝人杜汶澤、「中箭（香港眾志）」等，話「邊個再派口罩物資就係鬼」。杜汶澤就話，希望「連登」網民可以適當「放下政治」，結果？咪就係冇人聽佢講囉。
網民「狂人筆記」前日喺連登出post，話「第一次咁嬲自己友」，「正常情況下，佢哋（藍絲）一世都唔會變，因為極權政府會維穩、照顧佢哋。但你睇下呢幾日，721都唔夠喚醒嘅『廢老』，落街排完幾粒鐘口罩就怒×政府。」
佢又話冇口罩就會死，當面對死亡嘅恐懼，「有飽飯食就得」嘅藍絲都會「造反」，所以「黃絲」派口罩，即係用自己嘅錢幫手「維穩」，斷送被關咗喺荔枝角嘅「手足」做咗幾個月嘅「裝修」及「火魔法」，又話「你嘅錢本來係可以幫到『手足』未來生活、打官司！」
被斥漠視「手足」鬧係「鬼」
「狂人筆記」仲點名杜汶澤、「中箭」同啲黃店，「邊個再派口罩物資就係鬼！」呢個網民亦提咗口罩嘅「正確分配方法」，就係畀黃店貴價賣畀啲客「吊下命」，或加入「黃工會」就可以獲贈口罩喎，呢啲咪叫「災難財」囉。
正常人都覺得咁樣諗嘢偏激，但呢個post竟然有3,000幾人讚好，得300幾人負評。網民「愛我-請留言」話，啲「廢老」冇口罩就會搵返建制派，建制派畀唔到佢哋嘅話︰「咁下次啲廢老仲會唔會投佢票呀？」
認衰求和無人理
喺呢班人嘅襯托下，平時激進嘅杜汶澤竟然顯得平和，佢前日喺facebook回應話，「你分黃藍，但係病毒唔會分」，口罩可以阻止病毒傳染其他人，如果一旦爆發，咩立場都無一倖免。不過，佢似乎都唔想得罪班攬炒派，於是呵返對方話「明白手足嘅憤恨」，但係大家要明白事理，適當時候要放下政治咁話。
不過，連登個post依然熱烈討論，大家一再講點樣用口罩威脅「藍絲」變「黃絲」，甚至應該直情病死晒啲「藍絲」佢，呢啲都係包括杜汶澤在內嘅泛暴派種下嘅因啊。 ■香港文匯報記者 杜思文