泛暴派認叻認唔切，不但搞到自己攞嚟煩，更被質疑淨係益返「自己友」。香港文匯報日前收到市民C先生報料，話自己前晚致電觀塘區議員王偉麟查詢派口罩詳情時，問咗句「警察家屬派唔派」後，王偉麟即大發脾氣鬧佢「你好煩」，然後「cut」線了事。佢批評王偉麟態度惡劣地冷待當區選民，辜負市民期望。
一眾泛暴區議員前日喺Telegram同facebook宣佈合辦「Project R」，話派10萬個BFE口罩畀全港長者、兒童、孕婦及其配偶，要人預先登記，但詳情完全欠奉，並解釋話係因登記做法各區唔同，叫市民自己留意返該區議員facebook咁話。
點樣派都要遮遮掩掩，街坊怕「先到先得」、「遲咗得個桔」，又驚唔係「黃絲」冇得攞，自然拿拿臨打畀議員問清楚。不過，街坊雖然諗住齊心抗疫，不分「黃」、「藍」，但有泛暴議員就未必咁諗。
王偉麟發癲「cut線」
泛暴議員旗幟鮮明鼓吹仇警已非一朝一夕，王偉麟今次一聽到街坊提「警察」即發癲「cut線」，反映泛暴派能否無私奉獻市民成疑，但成日淨係想益「自己友」就毋庸置疑，不如學吓人哋建制派點派啦！民建聯為解市民所急，日前將獲捐贈嘅5萬個口罩，喺本月1號派畀各區基層市民，其間完全冇經過「篩選」。 ■香港文匯報記者 黃書蘭