選舉近了，策略都要改變。今時今日「愛與和平」再冇市場，一度高舉呢個口號、「佔中三丑」之一嘅戴耀廷都好醒目改口話唔再反對暴力抗爭，連「武裝革命」都接受喎。唔少「獨人」見佢終於「悔改」，都大讚佢「進化」，「香港大專學界國際事務代表團」前發言人張崑陽甚至吹奏話「有一種法治叫戴耀廷」，真係令人打冷震。有網民就睇得好透徹，覺得一切都係為選舉︰「×噏完，最後咪又返反（返）去『雷動2.0』。」
壹傳媒創辦人肥佬黎（黎智英）當年已經俾人揭發佢話戴耀廷「書生做事，唔幫唔掂」，而佢旗下嘅《蘋果日報》亦一再配合戴耀廷鼓吹違法「佔中」，日前該報又有助攻，幫戴耀廷做咗篇撐「勇武」訪問，一再推倒2014年嘅自己，由當年聲稱要非暴力地「公民抗命」，到（𠵱）家變成「非暴力其實是暴力的支持基礎」喎，仲話唔再反對暴力抗爭，連「武裝革命」都接受。
「的士梁」「讚」戴進步神速
呢番深得「勇武分子」心嘅言論，引起唔少「獨人」讚不絕口，例如「港獨」組織「香港民族陣綫」就話佢「呢幾年真係有進步」；曾經被DQ立法會議員資格嘅「獨人」「的士梁」（梁頌恆）亦「讚」佢「進步神速，值得致敬」。
嘲最後咪又返去「雷動2.0」
有人就留言問「的士梁」係咪會參加「雷動2.0」，「的士梁」就自嘲「『香港獨立』前都入唔到閘」。其實咪係囉，討完啲激進選票歡心，「獨人」又冇得選嘅，有咩所謂啫。所以「Alan Kong」都話︰「×噏完，最後咪又返反（返）去『雷動2.0』。」
佢就冇得選啫，有啲人就有「大好前程」，例如日前喺facebook起勢吹奏戴耀廷嘅張崑陽。張崑陽突然同戴耀廷攀關係，話自己中學讀過佢嘅「『法治四層次』理論」，令佢第一次知道有「以法達義」呢個終極目標，仲以標題同結語話「香港，有一種法治，叫戴耀廷」，簡直就係民主黨鄺俊宇上身咁令人打冷震。
肉酸都唔緊要，好過未表態嘅開始俾人逼宮，分分鐘下屆立法會都見唔到佢。當戴耀廷都講得出「法治已死」呢啲口號，唔少人就追問「over my dead body」，即係公民黨黨魁楊岳橋，睇佢幾時先會「悔改」。係囉，唔知幾時呢？今鋪真係「香港，有一種悔改，叫『法治已死』」嘞。■香港文匯報記者 甘瑜、郭家好