■「黃廠」將部分口罩製成鮮黃色，並印上「F.D.N.O.L」，吸引「黃絲」。 Yellowfactory fb圖片泛暴派冇料到，仲要學人整口罩。喺「街工」立法會議員白頭佬（梁耀忠）搭橋下組成嘅「黃廠」，噚日完成咗首批口罩嘅購買登記，有啲口罩仲特登整成黃色，又印埋所謂「五大訴求、缺一不可」嘅英文簡寫「F.D.N.O.L」。不過，批口罩未投產，就俾同路人揭發口罩嘅微粒過濾率（PFE）只得77%，另一個指標更只係相當於N80口罩，但《蘋果日報》依然大力報道同讀者推銷埋要點買。有啲「黃絲」就話，本土口罩一定係「質素是良知」，呼籲啲同路人唔好再推呢個罩。
印「獨語」玩「情感綁架」
「黃色經濟圈」除咗「人血龍門」仲有咩新聞？幫過白頭佬梁耀忠助選嘅「黃絲」，喺梁嘅幫手下搵到幾個所謂「熟悉技術」嘅人搞咗間叫「黃廠」嘅口罩廠，仲搵埋「手足」打點。佢哋就聲稱「有信心口罩達到歐盟EN14683-01的標準」，但原來未完成檢測認證，檢測結果會稍後公佈喎。雖然目前係無證產品，不過佢哋就急住賣，噚日完成咗登記??。首批口罩中有5,000盒係所謂「特別版」鮮黃色口罩，印有「F.D.N.O.L」。
呢幾日都見唔少「黃媒」幫佢哋宣傳，《蘋果》當然喺度。但仔細一睇，擔心炒車嘅�哋喺標題同埋內文的前半部分明讚間廠，講到人哋有咩設備、點樣購買、幾咁有堅持要整口罩，但去最後先擺埋「化學專家」K. Kwong鄺士山嘅講法出嚟。
K. Kwong話，要達到ASTM Level 1標準，細菌過濾率（BFE）同微粒過濾率（PFE）要有95%或以上，但「黃廠」口罩嘅物料只得77%；另一項指標MPPS，N95就係95%，但「黃廠」口罩得80%，即係同N80口罩一樣。K. Kwong講明，呢款口罩「尚算可阻擋飛沫」，只適宜一般情況下用，去醫院就唔好嘞。
成日整文宣嘅「黃絲」「Kit Da Sketch - Kit Man」都喺facebook開post話：「PFE 唔合格，壓力（DELTA P）和flammability（易然）無寫明，只有BFE過95%，嚴格而言ASTM Type1都未夠，重（仲）要無證書。」直言款口罩「只用顏色同文字做情感綁架」，又話梁耀忠「 喺你需要佢果（嗰）陣佢就×冧（求祈）囉。」佢都直言， 如果「黃店」要求好食係良知，咁本土口罩一定係「質素是良知」，呼籲啲同路人唔好再推呢個罩。
不過，「黃廠」則話歐盟EN14683-01標準只要求BFE 95%或以上，佢哋有98%，唔明點解要用ASTM做標準喎，咁又係，做乜要搞到「咁難」啫。不過香港雖然冇對口罩效能作統一法定標準，但特區政府早前推出嘅資助計劃就要求口罩需符合最新版本ASTM F2100第一級防護標準，消委會都係用呢個標準做測試，咁大家明啦。
有網民質問「黃廠」點解釋，佢哋就喺facebook話，佢哋對《蘋果》嘅報道「深表驚訝」，原來《蘋果》只係攞咗一張相去問K. Kwong喎，話經過跟進，《蘋果》「知道過失後已把此段文字回收」，但我哋截稿前就依然見到篇報道嘅相關內容仲喺度。
「Samuel Kot」話︰「 就算唔講顏色、唔講呀（阿）梁生嘅黑歷史，口罩基本過濾能力有問題，點用呀？」「Charlie Coffee NA」亦問︰「仲有一樣野（嘢）要提，染黃色既（嘅）顏料佢無任何資料提供，有無毒素？戴左（咗）上面安全？」
「黃絲」盲撐話留打卡用
不過有黃絲就諗到個口罩嘅另類用法。「Vincent Man」話自己諗住買嚟打卡，「出街我會戴3M。」「思想。影視媒體隨筆」揶揄︰「原來口罩不是戴的，係『儲存』的，我睇到真係噴血。」
■香港文匯報記者 文根茂