■台灣網民得悉班「港仔」妄想「移民」台灣後，紛紛出嚟留言話「不歡迎香港人入籍」。網頁截圖港區國安法即將立法，唔少做咗虧心事嘅「黃絲」驚到話要「移民」去台灣，當正人哋無任歡迎咁。不過，原來班「黃絲」可能只係一廂情願。話說噚日facebook有帖文圖文並茂話喺台灣嘅台北車站，有好多台灣人「支持」香港班「黃絲」搞「革命」、「港獨」。照片所見，確有好多人喺北車集會，又有人揮舞「光復香港，時代革命」、「香港獨立」旗幟，帖文仲話：「You are never alone（你永遠不會孤單）」、「台灣撐香港」、「謝謝台灣！」，然而咁大陣仗嘅支持，原來只係造假！
唔理人哋感受 自唱「港獨」歌曲
事緣早前傳出台灣台鐵擬唔畀任何人喺北車大廳坐地下，唔知係咩人發起咗個「坐爆台北車站，野餐唱歌靜坐躺臥皆可」嘅活動，噚日有400幾人到北車大廳聚集抗議。
不過，呢個以反對台鐵「唔畀坐地下」為號召嘅集會，好快就俾班好識借位嘅「黃絲」港生「騎劫」，拎住「港獨」旗係咁借位打卡，仲唔理人哋感受，自己唱起「港獨」歌曲「願榮光歸香港」，班睇相唔知實情嘅香港「黃絲」，仲以為當地真係舉辦緊台灣「港獨」集會。
台網民都覺港要歸屬大陸
假帖一出，唔少「黃絲」網民都話好感動。「Uay Nosna」就話：「多謝，台灣『手足』！」咁其實班台灣網民點諗呢？真實對班「黃絲」都幾殘酷。台灣網民都覺得香港要歸屬大陸。
好似「Johns Tsai」質疑：「北車跟香港有什麼關係啊？」「王冀鵬」就答佢，班「黃絲」港生「來亂的吧，要把台灣變香港喔！」香港「黃絲」「Jack Lee」就夾硬兜：「港人跟台灣人一同爭取民主自由。」「鍾玲」就反駁佢：「香港是歸屬大陸，別搞（攪）混了，一點關係都沒！」
班「黃絲」想將喺香港商場搞事嗰套荒謬邏輯帶去台灣，唔少台灣網民都群起鬧班「黃絲」。「賴福生」咁講：「別濫用民主自由，把不應該當應該！」「蔣一昇」就鬧：「動不動用什麼『光復』、『奪回』等字眼，好好祥和台灣社會被這些人弄得充滿『戾氣』。」「明茍葛」則說：「雙標黨教育出奇才不奇怪啦！」
睇返台灣三立新聞網最新報道，原來好多台灣網民得悉班「港仔」妄想「移民」台灣後，紛紛出嚟留言話「不歡迎香港人入籍」，理由包括「文化有差異，港人很愛計較得失、脾氣差」、「港仔的個性真的會比理性大陸人還討厭」等。
「黃絲」啊！何必「自欺欺人」呢！
■香港文匯報記者 黃書蘭