過氣「左膠」批寧丟空不畀「草根」用 學聯舊怨又燃新火頭
「抗爭派」上位後有權用到盡，甚至濫權獨裁就係人都見，估唔到對同路人一樣咁絕情。早幾年學聯被「抗爭派」把持後，一直試圖迫走唔啱Key嘅「自治八樓」，舊年終於通過法庭驅逐班人，獨佔大台。近日，有「自治八樓」中人就開post鬧學聯寧願廢棄「八樓」而唔畀「草根」使用，仲鬧埋當年嘅學聯秘書長、今日嘅九龍城區議員李軒朗唔理九龍城區有需要嘅居民。唔少過氣「左膠」都加入踩學聯系嘅「抗爭派」，學聯系嘅「抗爭派」就鬧呢班人「好×煩」，惡到霸氣外露。咁又係，佢哋連傳統「飯民」都唔怕，今日已有成為大台之勢，使怕你哋班「左膠」？■香港文匯報記者 文根茂
所謂「自治八樓」係學聯嘅物業，喺�哋九樓會址樓下，但2006年「八樓」同「九樓」因理念分歧而宣布「自治」，好一段時間都冇王管。
直至幾年前出現「退聯潮」，唔少院校退出唔再做學聯會員，「九樓」慢慢就被「抗爭派」把持。2017年，「九樓」決定全面收回「八樓」嘅管理權，後來仲打埋官司，「八樓」班人就鬧對方係「成功爭取法庭機器排除異己」。
呢個恩怨日前又再燒過。「自治八樓」嘅「Michael Ma」日前發帖話，唔甘心「八樓」「響洪流中默默無聲地湮滅」，指責當時學聯應承收樓後會「善用空間」、分配畀民間團體使用，結果個單位就荒廢至今。佢不點名提到如今已經成功「升呢」為九龍城區區議員、當年迫遷「自治八樓」嘅時任學聯秘書長李軒朗，暗諷佢唔理九龍城區面對拆遷嘅居民，反而一班「響八樓中認識嘅朋友」正組織幫班居民。
一帖唔夠，「Michael Ma」又再po相發帖話，有一位朋友兩個星期前拍攝到被荒廢嘅「八樓」，當年由「自治八樓」貼上嘅「八樓場地協調借用方法」仲喺門上。佢揶揄呢度「尤（猶）如一塊官地，當然是寧可圍封荒置，都唔應該被不合心意嘅賤民在上耕耘。」
「八樓」揭私怨 「左膠」踩多腳
呢個post好快就俾唔少過氣「左膠」轉發，大家一言一語咁表達對學聯系「抗爭派」嘅不滿。「民陣」前召集人、「退聯潮」之前嘅學聯副秘書長楊政賢就話︰「土地資源有限，不如認真定個時間表，用黎（嚟）做展覽又好，或俾（畀）團體做office都好過掉（丟）空。」社民連前副主席周諾恆、職工盟組織幹事杜振豪、油尖旺區議員朱江瑋、「勞工組」王曉君等人紛紛轉發，而左右逢源嘅「議會陣線」朱凱廸都轉發咗個帖文。
「抗爭派」反斥「八樓」無保養
當時有份爭奪「自治八樓」嘅學聯前常委張朗軒見狀就出面狙擊。佢喺facebook將呢個帖文cap圖轉發並反擊，話過去呢一年大家「個個係（喺）出面打仗救人」，「知唔知點解未開得呀？啲學生比（俾）人拉×晒呀！」佢仲話，呢一年「學界」做咗咩大家有目共睹，直鬧「Michael Ma」「同果（嗰）啲情緒勒索post點解xxx冇人關心一樣，好×煩。」
佢仲話，係「自治八樓」用到個單位好污糟，個渠又塞咗，佢再貼出啲天花石屎剝落、玻璃窗裂咗嘅相出嚟，話係佢哋搞到個單位用唔到喎。
「Michael Ma」就寸爆學聯不嬲唔做嘢︰「可能學聯連個網都長期癱埋，FB又癱左（咗）大半年，2020年換屆資訊工作報告完全冇公開，都係因為前人冇做好，保養護理不善之故。」又寸佢哋「可以撥十幾萬預算出來請律師，但講到八樓狀態咁惡劣，上年三月收到樓，到六月運動爆發前都冇搵人修補呢個恐怖地方。」杜振豪都幫腔話：「八樓的保養費用，其實理應係由九樓負責。」
不過，已上位嘅「抗爭派」今日都唔使仰人鼻息，大鬧「自治八樓」班人係「租霸」、「無賴」，張朗軒仲暗寸「Michael Ma」︰「點解30歲仲要留戀學界？」
「抗爭派」係好難制衡㗎啦，咪又係攬炒派用「不分化、不割席」養出嚟，怪得邊個。