■向晴軒就事件公開致歉。 網頁截圖唔見嘢報警都係正常處理方式，偏偏喺「黃絲」眼中就係要「落地獄」嘅行為。明愛向晴軒日前喺facebook專頁致歉，話佢哋專為理大學生提供即時危機輔導支援服務嘅「為理在線」，日前有社工不小心遺失咗相關嘅121位學生資料，已報警處理同通知個人資料私隱專員公署。不過，一班「黃絲」就鬧爆向晴軒「靠害」，問佢哋係咪想啲學生俾警察拉，講到做親輔導嘅都係暴徒咁，咁易焦慮暴躁，佢哋可能都需要做吓輔導。
向晴軒日前喺fb刊出道歉聲明，話佢哋2016年由理大委託開設、專為理大學生提供即時危機輔導支援服務嘅「為理在線」，今個月4號有社工意外遺失「存有學生基本資料備份的行動儲存裝置」，有121位學生受影響。佢哋對事件感到萬分抱歉，話會承擔應有責任，佢哋會對個社工作紀律處分，並成立專責小組檢討問題，避免同類事件再次發生。
已公開致歉 盼減低影響
向晴軒仲話，已報警處理同通知個人資料私隱專員公署，亦都緊密同理大身心健康及輔導處溝通，希望將影響減到最低。如果有同學懷疑自己資料俾人盜用，都請立即報警。
不過，遺失資料似乎都唔夠佢哋報警咁大件事，一堆攬炒派網民留言激動鬧爆佢哋報警。「社運攝影師」曾志浩直情問對方有冇腦︰「竟然叫學生『報警求助』？係咪靠害？仲要打鑼打鼓出『道歉』聲明，咁係咪即係叫警察俾（畀）心機搵你哋client（客戶）名單出嚟！你哋知唔知自己做緊乜？」「港獨」分子黎耀駿亦話︰「報警......無事都變有事，真係多×謝晒。」
仲有班「黃絲」直情覺得要做輔導嘅理大學生一定係憎警察嘅暴徒。「Fannie Choi」話︰「我諗佢地（哋）絕大部份（分）都係因為班警察令到佢哋有情緒困擾要求助，你地（哋）竟然仲可以官腔到叫佢哋報警求助，基本empathy（同情心）都冇學咩人做輔導？」「Aosh Wong」亦稱︰「毁掉這麼多個案的人生，一句致歉，一句門面說話就能推搪，真係荀（筍）工。」
李傲然擺官威被網民KO
另外，自稱首先接獲事主求助的油尖旺區議員李傲然，就上去留言擺官威話︰「首先我想問，點解唔覆我電郵查詢？要我自己睇住新聞，只係覆傳媒，唔理個議員？」不過，網民「Bono Cheung」就一句窒到佢啞口無言︰「唔關你係咪議員事，依（??）家受影響嘅係大眾，尤其搵過佢哋嘅求助者，任何人嘅查詢佢哋都應該要覆。」
■香港文匯報記者 甘瑜