【資料速遞】飛馬輝煌俊仔搏盡

2020-09-29

弱肉強食係生物界不二定律，馬圈唔例外，練馬師希望有肯花錢馬主來投，當然高價馬唔等於高質，但起碼買到佳駟機會好大。咁良駒當前，騎師睇唔到都收到風，手快有手慢冇，有得贏梗係擸咗先，物競天擇適者生存，呢個道理好淺顯，馬圈富者越富，騎師榜前三強好手，見到有對手坐騎跑得好，就會向練馬師，甚至乎馬主埋手，企圖收歸旗下，好似開鑼日隻「飛馬輝煌」，初出直路不敵「路路之星」跑第二，據悉之後潘頓睇中，幾度向丁冠豪開口，希望下次接手效力，好在「飛馬輝煌」馬主好公道，認為梁家俊冇功有勞，所以已婉拒潘頓好意，今次繼續交由梁家俊操刀，為保住帥權家俊仔呢鋪肯定搏到盡。