■連登仔討論如何處理「Lunch仔」。 網上截圖靠「和你Lunch」上位嘅「Lunch仔」呢排俾大堆「手足」聲討，不過「黃絲」點都諗唔到，之前聲稱要報警拉「手足」嘅「Lunch仔」竟然真係走咗去報警，大鬧佢係「社混垃圾」，並喺Telegram（TG）同連登討論區度提出「解決」佢嘅辦法，包括「私了」、公開佢啲衰嘢等。不過，報咗警嘅「Lunch仔」完全冇驚過，繼續搵嘢攻擊班「黃絲」話︰「與其係（喺）度浪費時間討論我，倒不如花多啲時間關注12港人仲好啦。」
「Lunch仔」啲衰嘢已經傳到通街都係，包括佢為咗呃光環做show，搞到警方拉橙帶，令還柙嘅「手足」家人冇辦法送車道別；打壓言論自由，用管理員身份喺TG群組移除不同意見的留言；俾同路人爆佢性騷擾「女手足」，一班「手足」終於唔忍啦，喺TG同連登討論區度提出解決佢嘅辦法，並稱佢為「社混垃圾」。
呢篇「『如何處理滋擾嘅社混垃圾』（David）」嘅帖文提出幾個方案，分別係「暴露社混垃圾嘅醜惡」，叫「手足」整理「Lunch仔」啲「罪狀」，放晒喺TG同連登洗版，又話「李國永騷擾女『手足』嘅裸照，不妨廣傳，甚至印製單張定期派發」。喂阿哥，其他人無辜㗎，做乜要人睇埋啲咁嘅嘢。
更激進嘅方案係叫「手足」犯法以「執行公義」嘅名義「私了Lunch仔」，「（佢）有邊條罪我哋唔足以行動？『私了』社混垃圾係最簡單直接嘅辦法」。
其實「Lunch仔」又真係唔驚呢場大龍鳳，仲叫人鍾意就繼續鬧佢，因為佢喺沙田嗰日已經報警備咗案，「你哋如果敢掂我，我一定告到底。」睇嚟報咗警真係會令人感到好心安。
不過，呢個行為都激起更多「手足」反感。網民「高學歷廢青」就話︰「報警篤灰係絕對唔可以做嘅事。」「掙扎皇丙朗」問︰「其實David你想點×樣，知唔知咩叫反思，×你老×以為自己出咗名就大×哂（晒）？」「走莞茜」鬧埋「Lunch仔」啲支持者話︰「點解有堆人總係好似係（喺）到（度）追星咁......當某啲記者/『手足』/『黃店』係神咁拜，成日盲撐，到底為乜......」
有疑似「Lunch仔」支持者就話，聚焦「Lunch仔」而唔係12人蛇嘅人都係「垃圾」，「Lunch仔」亦喺fb回應︰「絕對認同，與其係（喺）度浪費時間討論我，倒不如花多啲時間關注12港人仲好啦。」 ■香港文匯報記者 郭家好