■《立場新聞》稱20名教會員工集體辭職，以表達對陳凱興�H失望同不信任。 《立場新聞》fb截圖不滿陳凱興涉捲款潛逃 累夥計被通緝
「早走早着，遲走瞓唔着。」講緊嘅係被網民戲稱專門「守護暴徒」嘅「好鄰舍北區教會」嗰班員工：該「教會」月初被警方揭發瞞報約1,800萬元捐款，結果被銀行凍結5個共涉款2,500萬元嘅戶口，部分職員亦被警方以涉嫌欺詐及洗黑錢罪拘捕。雖然一眾員工當初講到案件係「宗教及政治打壓」，但佢哋近日竟然集體辭職，原因係要對正被警方通緝、目前連同家人身處英國嘅教會創辦人陳凱興表達「失望」及「不信任」喎。咁又係嘅，疑似中飽私囊嘅老闆已經着草，留喺度嘅員工隨時冇糧出，亦唔排除有更多員工被查出協助教會瞞報捐款，所以學吓陳凱興咁走得快就「好世界」嘞。
■香港文匯報記者 雨航
《立場新聞》近日報道，有教會員工匿名向傳媒發咗封「集體總辭聯合聲明」，而呢個消息亦經已從教會離職嘅社工劉家棟證實。
呢封聲稱由20位教會員工一齊寫嘅聲明，提到員工本來希望「奮戰到底」，點知陳凱興「始終未能釋除員工疑慮，亦未曾重視員工的安危，更令同事感到不受尊重，未能安心工作。在眾多事情影響下，最終只好無奈選擇離開」。
聯署斥陳漠視員工安危
呢班員工仲話希望聲明能「以正視聽」，讓公眾對教會以至陳凱興有更多了解，但受保密協議所限，所以未能透露太多細節喎。
網民對嗰啲未能透露嘅細節眾說紛紜。「Mark Yeing」就猜測：「『總辭』係因為教主及教主夫人拎走曬（晒）D（啲）錢，又隱瞞原來眾籌收咗咁多錢唔入教會自己袋曬（晒），搞到留低嘅人全部涉嫌詐騙眾籌，只有所有錢入返教會，眾籌事件就冇詐騙成份，即係所有人都可以平安，但宜（??）家條神棍穿柜（櫃）桶箸（着）草，其他人做炮灰，唔嬲就奇。」
網民寸淪炮灰唔嬲就奇
「Eric Yu」就揶揄：「個個身有屎，仲唔走？」「Alan Khng」亦揶揄：「基本上，只要把自己偽裝成對抗強權，都會面對無法預測的捐款收入。」「Mary Chung」則形容：「船長跳船後呼籲仍留在沉船上各船員須繼續努力永不放棄......但當水浸眼眉後船上眾人終於醒覺自己身處的不是羅（挪）亞荒（方）舟。」
眼見其他網民不斷鬧陳凱興同班教會員工抵死，「Virginia Yu」就遷怒《立場新聞》：「『聲稱』？《立場》你確定咗真假先出稿得唔得？」「Boris Wong」亦慨嘆：「《立場》不再『立場』，竟然搞分化。」「歐陽神風」就話冇眼睇：「睇住d（啲）評論真係笑到碌落地，真正見識到咩（乜）叫做死都拗（詏）翻生。」