●劉家衡同「同路人」鬼打鬼。「南昌北 劉家衡」fb圖片全世界忙住抗疫，攬炒派就忙住鬼打鬼。佐敦疫情爆發，特區決定喺該區指定範圍劃出受限區域，其後更首次引用「禁足令」封區。啲攬炒派雖然提唔出有效控制疫情嘅解決方法，但就梗係咩都要反對，仲要篤灰以示「態度堅決」，將啲曾經有份「助推」個決定嘅「同路人」區議員揪出來公審。個啲被點名嘅區議員就咬返佢哋斷章取義，搞分化，搞到花生一地。
由疫情開始至今，攬炒派除咗好似製咗嘅唱片一直講「封關」之外，對點樣解決疫情喺地區擴散一啲有用嘅建議都冇，只能通過咩都反對嚟刷存在感，一時反對檢測話個人嘅DNA會「被送中」，一時反對設立地區檢控站話會「播毒」。搞吓搞吓，班友咪一樣叫人去檢測，政府設立檢測中心一樣去宣傳叫市民去，仲變臉鬧政府做得唔夠??！
熱狗揶揄係封區「始作俑者」
好啦，政府首次引用「禁足令」封區，有攬炒派中人就話呢種係變相剝奪人身自由，仲講到喺政府遲啲打壓各區嘅「陰謀」。被指為「熱狗的衛星page」嘅「卡比日報 Kabigon Daily」日前就喺facebook發帖，點名話公民黨嘅深水埗區議會（南昌北）區議員劉家衡喺今個月20日接受Now訪問時明言「只劃區做檢測，唔禁足就會令疫情擴散」，揶揄佢係封區嘅「始作俑者」之一，仲「恭喜」佢成功爭取咗特區政府嘅回應咁話。
油尖旺區議會區議員朱慧芳亦被發現曾經喺受訪時講過：「需要擴大強檢範圍，因為已經看到有擴散的跡象......如果是檢疫，我覺得大家都接受的，既然隔壁都已經做了......為什麼容許這區有漏網之魚呢？」
啲「黃絲」就議論紛紛，好似「Missing Kkl」就鬧：「搞成咁原來佢有份。」「ArTing Lam」就揶揄：「公民黨同香港人求仁得仁，恭喜恭喜。」
區員fb反咬「同路人」斷章取義
見啲風勢唔啱，劉家衡好快喺facebook反擊，話自己喺訪問中指出如強制檢測不配合禁足令，反而「增加疫情擴散機會」，「此句是衛（衞）生常識，若單封區和強制檢測，人口還是會繼續流動，更會令人（包括染病者）湧去其他區避免被檢測，當中包括一些違反居留條件的人，此舉只會令疫區人口四散，全港大爆發。」又話呢個邏輯，同攬炒派當初要求「封關」一樣。
佢又抹黑特區政府從來唔聽民意，反駁啲人如果覺得禁足係佢「可操控」，「恐怕是想像力過於豐富」，跟住又反咬啲「同路人」何必斷章取義，「言及出賣我心有戚戚焉。欲加之罪，何患無辭？」
「我要焦土 Let You Burn」就cap咗同劉家衡聯合使用辦事處嘅深水埗區議員長沙灣社區發展力量李文浩，喺某個深水埗居民群嘅留言，圖片顯示李文浩幫腔話佢哋接受訪問嘅時候，「講到明支持宵禁，最好停埋港交所。但係唔係淨係禁一個區，全香港一齊禁。」又鬧啲人cap一兩句出嚟搞分化，更挑機：「要撩交嗌隨便，本土派最唔怕嘅就係嗌交。」
「我要焦土 Let You Burn」就稱：「嗱，係佢自己講架（㗎）。佢支持宵禁，所有區禁足，停止社會一切運作，遲下全港封鎖唔好又問點解。」仲要cap佢嘅留言嘅全文揶揄：「今次唔好話淨係cap一兩句出嚟啦。」
「卡比日報 Kabigon Daily」亦不甘示弱開mic寸返劉家衡，話「強制檢測」根本「冇用」，而佢作為區議員根本唔知個區嘅居民手停口停，仲繼續質疑係佢建議政府加埋禁足令。
呢場交嗌成咁，啲網民都覺得冇眼睇，「Albert Hung Athras」都驚訝：「仲有停港交所？你老幾？你自己×就好。」「Mon Yim」感嘆：「民選黃色區議員呀？求仁得仁！」
●香港文匯報記者 文根茂