[2005-03-23] 永亨財務擴張三舖齊剪綵 放大圖片
永亨老闆馮鈺斌昨日罕有捧場永亨信用財務的開幕活動，更是支持臨別的冼國林。
．張三笑．
唔覺唔覺，原來永亨信用財務已經分別於新蒲崗、沙田及朂魚涌開了三間分行，永亨諗住湊一湊熱鬧，昨日一次過舉行「三舖聯開剪綵儀式」。向來低調的老闆馮鈺斌畀面出席活動，擔任主禮嘉賓，為的除了慶祝開舖之餘，更可能是為三笑舊朋友——永亨信用財務董事兼總經理冼國林餞行。
冼國林臨別老懷安慰
永亨信用財務開國功臣冼國林任職永亨9年後，今個月底就要離開，所以昨日是冼國林最後一次以永亨信用財務董事身份出來同記者朋友見面。冼國林同三笑講，昨日心情的確有些特別，因為馮生向來低調亦出來捧場支持。加上自己一手揍大個「仔」，又選擇効個仔成績最好時離開，公司肯派重量級人馬來接手工作，身為「奶媽」的他亦覺老懷安慰。
三笑之前都聽講冼國林會去英國讀法律，但唔知背後原因。原來佢同三笑講，佢太太亦係一位律師，所以自己都好想做個大律師，而且「單身」漂洋過海到英國，係學好英文的最好機會。
往英國圓大學生活夢
冼國林仲偷偷地話畀三笑知，雖然佢而家已經四十幾歲，考晒銀行牌，考埋碩士學位，但原來佢所得的學位一直係靠在公開進修大學進修回來，自己從來未過過大學生活，所以今次係一個好好的體驗機會。
講番昨日的活動，作為市場上最積極的參與者之一，永亨信用卡財務今年將會推出一張日本信用卡吸引年輕人，永亨更專登邀請到英皇娛樂歌手關智斌(Kenny)及環球唱片歌手黃伊汶做代言人，以積極進軍年輕人信貸市場。
|
放大圖片
