|
洪 放
港股狂飆，食事頻繁。梁公每沽一隻股，必搵四叔找個落腳處宴請各方好友。某日又聽見四叔朗朗笑聲：梁公有令，馬季收鑼，馬會人丁兩旺，全年總投注回升，恰巧又是十年回歸，理應整餐賀一賀，大家杯上杯落聚一聚！
一個人好客，請吃飯總有千萬個理由，兩位長輩厚愛，洪放惟有挺著四十吋腰圍，笑吟：梁園歌舞足風流，美酒如刀解斷愁；憶得少年多樂事，夜深燈火上礬樓。
高陽（一九二二—一九九二）嘗言：飲食之精潔，須有人提倡。提倡美食，殊非易事，要有錢、有閑、有地位、有興趣。四「有」缺一，資格不備。有錢不必說；還要肯花。捨得花錢，還要有閑工夫；因為有閑工夫才有此閑情逸致。只是治餚精潔，到底還是主觀的。粱公與四叔，四者備矣，四叔尤其有吃遍人間煙火之逸興；他說：「我們幾兄弟，某日在跑馬地鳳城閒聚，酒酣耳熱之際，梁公笑問其除了窩貼明蝦、炸子雞、炒鮮奶桂花卷外，能否做八寶鴨？經理答之無問題，預先一日訂即可！此次廣發英雄帖，就係要試𣈳隻八寶鴨！」
於是，回歸前兩日殺上跑馬地鳳城，筵開兩席，言笑宴宴，好不熱鬧！迨至主角八寶鴨出場，蒸得極爛，但見侍者自頸至腿，節節開解，熱氣奔躥，噴香而出，眾未舉箸皆稱妙！惟「魚王」關總口痕：未知是家鴨還是野鴨，若是野鴨，則脂不漏而腴！
沈老闆好謔，回敬兩句：吃魚你係專家，估唔到連鴨都有研究，原來家花不及野花香，其理與野鴨同！眾為之轟笑絕倒，大隻朱逾二百磅之身軀顫動如山崩，一腳「伸」落紅地氈，但見八寶鴨頭忽地矗立，大隻朱似有所悟：啊！大良野雞卷所以唔香，因其乃家鄉雞也！眾為之噴酒！
洪放但知炒鮮奶所以未夠香，非大廚之罪，乃牛奶非水牛奶之故。大良附近多土阜山丘，崗草茂盛，所養的本地水牛，產奶雖少但質量高，水分少，油脂大，特別香濃。不過，建議可加入蟹肉和一點點炒香了的杏仁末同炒，以補奶味先天之不足。
|
