 放大圖片
■曾被譽為「翻版古天樂」的他，現已獨當一面。
過往，吳卓羲有不少負面報道，什麼欠好友古天樂50萬，什麼豪買百萬名車與黃宗澤鬥威，什麼在片場掉劇本，最經典的還有「賣飛佛」（my favourite）等，負面報道令吳卓羲曾萌生退出娛樂圈的念頭。「其實負面報道對星途一定有阻礙，但有阻礙人生先會有進步。我不信人一出生就會平步青雲，每個人（藝人）如果一開始就已經是劉德華，咁將來遇到事自己未必接受到，再者華仔都一步步捱上去啦。有挫折才有推動力，但遇到負面消息，我都有氣餒的時候，特別是有些失實的報道影響了我的家人。像之前話我欠古仔50萬，作故仔的記者作完就算，不負責任，完全沒理其他人感受。借50萬那報道出街後，我家人好緊張打來問我發生咩事，那影響真係好大。當時那無形的壓力令我透不過氣，我最介意是家人都信以為真，令我媽咪好擔心。有一刻我都諗過點解當初要入行呢？是否入錯行呢？不如算啦！後來家人同公司的支持，令我放開懷抱，做好自己。跟住上年又話我買百萬平治名車，平日工作辛苦，住同車我都比較花多少少錢。而且當日我另一部車冇牌費，咁我當時是駕這部有牌費的，而且我又不是駕出去大圍活動，只不過是駕回公司，個記者硬要在我家樓下等，然後話我花百幾萬買車，我都沒法子。」
學會待人之道
成日都聽到TVB有很多高層飯局，那吳卓羲有否去過呢？「我未試過單獨同高層食飯，娛樂圈不是大家想像般黑暗。其實在TVB工作一年，等同你在外面工作3年。你每一日接觸不同的人，同咩人要用咩態度、咩語氣去講嘢，好考你技巧。以前我為人好倔，好鍾意抱不平，有嘢睇不過眼會立即出聲，有時會令身邊人好難受。現在我明白人人都有不同的難處，識為人諗嘢，遇見不平事，先停一停，做好了自己份內事，找適當例子告訴對方。舉個例說，以前拍劇見到PA（助導）做錯事，我會立即指出問題，但入行久了，自己都明白劇組PA流失量大、工作多，有時他們做錯了少少事，我會等沒有人在身邊時，同對方講聲，免他下次畀導演罵。」
不能做回普通人
入行十年，今年踏入30歲的吳卓羲怎看這十年光景呢？「呢十年有得有失，得是多人認識了自己，搵錢比以往多。如果一套劇受歡迎，自己在東南亞、內地、加拿大等地都有Fans，那滿足感很難用言語去形容。當然自己也失去了很多，首先是冇咗好多年青的日子，失去了和朋友見面的時間，入行初朋友約我十次食飯，十次都出唔到。同埋做藝人沒有了私人空間，不能行差踏錯。但我好清楚明白，只有不斷向前行，不可能返轉頭做回普通人。如果我十年來都原地踏步，咁我就應該退出，以前唔識包裝自己，現學懂自我包裝說話。」
|
放大圖片
