 放大圖片
■莊文強給想入行做導演的年輕人的忠告，就是要捱得。
用風塵僕僕去形容莊文強導演訪問那天的狀態應該沒錯，本在內地拍攝甄子丹新片《關雲長》的莊文強，在車輪式地做了多個訪問後，已經頂唔順要飲咖啡頂倦意。但一說到電影，即精神奕奕，更跟記者分析近年電影圈青黃不接的原因。
電影公司宣傳公關曾問記者《飛砂風中轉》呢個戲名是否很難讀，坦白講真的有點難，所以坐下來做訪問，不禁要問莊文強導演為什麼起個咁難說的戲名。「這是一份情意結，來自周潤發主演的經典江湖片《我在黑社會的日子》的主題曲名字，一邊寫劇本，一邊已想好用呢個名。新戲好似一套黑社會電影，其實是鬧人生。現在資訊好快，一句話亦傳得好快，你聽完好多個版本後，已經唔知邊一個版本正確。什麼是對、什麼是錯，好難定。講個活生生的例子，我有2個女，都好聰明、讀書都OK叻。當初身邊朋友都同我講，你要比個女去讀名校，要去讀DGS呀，咁你個女將來就會有好的出路。但到最後，我個女入讀普通學校，但我見到佢好快樂。其實當時佢細個，我和太太陪佢去九龍塘的名稚兒園面試，一入去已經feel到唔舒服，最後我們都沒讓女兒讀名校，舉這例子就是要同大家分享一件事怎分對與錯，是不是別人說對的就是對呢？在新片中，就是用了這種人物影射。」
給新人一個機會
近十年來，不少電影人感慨香港電影圈在導演及演員上，均出現青黃不接的現象，莊文強一一道出原因。「先講演員方面，你見現在娛樂圈的新人，一出來就有經理人為他們擋駕，呢樣又話唔接，果樣又話唔做。我聽華仔（劉德華）講，以前他在TVB訓練班，接到一個士兵角色已經好開心，然後會為呢個角色加自己的特色。我好鍾意用新人，所以今次我起用了師兄劉浩龍、陳子聰、藍奕邦等，你看師兄今次的表現，你估唔到佢可以去到咁盡，我敢肯定來緊會好多人找他拍電影。如果你覺得你所拍緊的演員愈拍愈少，咁畀多些機會新人。我發掘過不少新人，葉璇、余文樂都是。演員成日話講Feel，但有些人就不斷問導演你要什麼Feel，唔試多些你點知。陳偉霆亦是一個好好的例子，當日經理人Mani(霍汶希)將佢交畀我，已講明不用客氣，點罵、點打都行，從佢一開始來拍電影，連企位都唔識，到早前我去睇《前度》，一睇完我立即打畀杜汶澤，問他陳偉霆拍攝時的過程，看到呢個靚仔從唔識問嘢到知道要問咩，都好開心。」
藝術包含商業成分
演員的問題解決，那不少新晉導演話難生存，呢個問題又點解決呢？「我公司有一批小朋友幫我，我會好現實地告訴他們這一行的景況。希望大家明白一門藝術，其實亦已有商業成分。每個演員都希望自己接到icon角色。你拿著劇本去向老闆拍門，你要清楚點去賣呢個劇本。老闆大拿拿坃千萬去開戲，你話對票房沒把握，老闆倒不如拿這千萬去買股票。所以我的電腦中，有A同B兩個劇本，A是拿出去畀老闆睇，用來開拍的，B是自己滿足自己的。呢一行不論演員同導演都要捱，你捱過了就一切順利，相反那些半途而廢，又話懷才不遇的人，就是捱唔過呢關。」採訪：植毅儀 攝影：Tokyo 場地：The Bali@彌敦酒店
|
放大圖片
