 放大圖片
【本報訊】（記者 梁靜儀）容祖兒昨日出席新碟《空港》記者會，會上除進行新歌首播外，並舉行祝酒儀式，多間電子媒體代表及贊助商亦派員出席。
祖兒表示對上一次出碟已是今年一月初，而這次出碟她會更畀心機及要好好照顧自己，她解釋因為經理人霍汶希要放假半年去美國讀書，她唯有加多幾錢肉緊宣傳。出道以來都有霍汶希照顧的祖兒，依依不捨地說：「以前有乜都會同佢溝通，每次開演唱會都會同佢嗌一次交，因為開演唱會心情已好緊張，但霍汶希仲會衝埋來叫我做其他嘢，無人咁大膽，只得霍汶希，佢走咗無了發洩對象。」
霍汶希之前一直無透露去讀書的計劃，遂令人懷疑她此行可能是秘密結婚？祖兒表示據了解霍汶希是去讀書，因為她每隔兩、三年便要菍菍，她很想像霍汶希一樣，但自己工作已排到明年。
經常介紹男仔
祖兒跟霍汶希會傾感情事，霍汶希又會經常介紹男仔給祖兒認識，但每次都給她請吃檸檬，祖兒心領說：「我唔鍾意刻意安排好的緣分，但佢好有我心。」她自言很揀擇，相信緣分會自然來臨的感覺。問到可擔心被指為「剩女」？祖兒即自辯說：「人地對『剩女』這個詞語唔理解，「剩」是用剩的意思，我都未開封，何來用剩？只要對自己有信心，大把市場。（放幾耐時間去等？）每個成功的例子都要付出時間，我唔心急，相信鐵柱磨成針。」
|
放大圖片
