 放大圖片
■舊情人許秋怡亦有現身，二人不避嫌在台上拖手攬腰，靚靚在台下大方欣賞拍掌。彭子文 攝
香港文匯報訊（記者 李思穎）張智霖（Chilam）的二場演唱會前晚圓滿結束，Chilam向太太袁詠儀繼續深情剖白，人緣甚佳的他除了邀得郭富城擔任嘉賓，又請來久沒在台上演唱的張柏芝開金口合唱，舊情人許秋怡亦有現身，二人不避嫌在台上拖手攬腰，靚靚在台下大方欣賞拍掌，而囝囝張慕童突然上台製造驚喜，充滿溫情。
前晚靚靚便在台邊企足全晚欣賞老公演出，座上客有Chilam媽咪和姐姐，藝人有余文樂、沈嘉偉兩兄弟、謝天華和太太、苗僑偉和戚美珍、胡杏兒、伍詠薇夫婦、蔡一傑等。
約靚靚60歲影婚紗相
張智霖盡訴與靚靚的感情經歷，他坦言最初不被睇好，對靚靚有所虧欠，連婚紗相都無影過，但自己好想約定佢六十歲後影一次，此時台下靚靚哭得更厲害，Chilam喊到要重唱一次《未婚妻》。他續說：「最近有雜誌話我太太唔舒服，係真的，甲狀腺有少少問題，但佢仍好努力陪我跑步做運動，好支持我，我要話佢知，無論生老病死都會同你一齊。」流下男兒淚的Chilam便獻上《骨膠原》，全場感動不已。
見城城多過見太太
尾場表演嘉賓陣容鼎盛，先有專程從內地趕回港的郭富城，Chilam表示同城城認識15年，有13年在一齊，見佢仲多過靚靚，隨即模仿城城《對你愛不完》舉手擘髀甫士，還抵死說：「唔可以再擘，再擘會爆。」順手摸一下褲襠，二人便一起合唱合跳這首歌，全場反應熱烈，城城形容二人是肝膽相照的好兄弟，現時是Chilam最弗時刻，希望他每年都在紅館開騷。接著城城演繹《狂野之城》，可能太興奮而入快了一句歌詞。
另一驚喜是張柏芝現身舞台，久未在舞台「開金口」唱歌的柏芝，以一身橙色打扮出現，與Chilam合唱《多謝關心》，兩人還拖手及攬腰共舞。太耐無唱歌的柏芝緊張得「甩嘴」，唱完後柏芝頻呼「緊張」，她說： 「多謝Chilam和他太太給予這次機會，我盡了全力，希望大家體諒。」Chilam踢爆她在下午練了150多次。
安哥時，Chilam的舊愛許秋怡出現，二人見面先來擁抱，又拖手合唱經典金曲《現代愛情故事》，他們的老公和老婆都在台下欣賞，王書麒狂拍太太，靚靚大方拍掌和唱，印證著大家都有自己天空。秋怡說：「19年無見，中間只見過一、二次，見你瘦了，同20年前一樣咁靚仔。」最後熒幕播出Chilam囝囝「魔童」唱《分分鐘需要你》片段，但見「魔童」拿著巴斯光年公仔突然在台上出現，Chilam立刻抱起愛兒親吻說：「好耐無見，呢個我個仔。」他問兒子有否掛住自己，可是兒子話「眼𠳓」沒有答他，搞到慈父「偏嘴」，十分有趣，臨尾時獻上一曲《祝君好》後灑下不捨淚話別粉絲。
望開part 2演唱會
Chilam在慶功宴上表示台上給靚靚的真情說話，事前無認真去度，都是發自內心，問他60歲真的補拍婚紗相？他笑說：「Why Not？」談到囝囝現身，他說：「見到片段已經好『冧』，完全不知他會上台，真的古蠱。(靚靚不上台？)唔好，魔童上台已經好驚喜，畢竟第一次有點怕醜，但比想像中勇敢。Chilam表示靚靚甲狀腺素低，正在康復中，(阻延造人計劃？)唔會，我都無計劃，順其自然。」Chilam又指柏芝好有心自薦做嘉賓，說到舊愛許秋怡，他自喻再合唱《現代愛情故事》猶如發夢時空錯亂感覺，相信觀眾都覺得好得意。」Chilam希望有機會開part 2和巡迴演出，稍後他便前赴內地投入拍攝電影《一代宗師》，所以不會休息。
|
放大圖片
