 放大圖片
■張學友今次演唱會的一大特色：與肥姐共舞。 韓小玲 攝
香港文匯報訊（記者 李思穎）張學友在紅館的20場演唱會於昨晚圓滿結束，開騷期間學友的太太羅美薇和兩個女兒及張媽媽都曾入座捧場，舞台經驗豐富的學友見到媽媽坐在面前時，竟然老貓燒鬚，緊張到「甩嘴」，學友一向孝順，他因演出關係未能慶祝母親節，所以他折現給媽咪，而老婆便交由兩個囡囡代表慶祝。
學友昨午四時到達紅館進行拜神儀式，祈求壓軸一場演出順利，現場早有逾百歌迷在烈日當空下撐著傘子，為求一睹偶像風采，但見學友心情絕靚，在拜神儀式後走到歌迷身邊，更不惜企在欄杆上跟歌迷握手和收禮物，表現親切，期間歌迷吶喊聲不絕，更有男粉絲大嚷「我愛你」，雖然經過十九場的演出，學友狀態大勇，只是被發現左邊嘴角損爛，學友尷尬地解釋說：「辛苦囉，都是這個星期先開始，可能燥熱和睡眠不足，已經塗上藥膏結了焦，好快無事。」
廿場演唱會昨壓軸
說到有男粉絲高呼「我愛你」，學友風騷地說：「好多呀，我地呢D係咪先，男女都無所謂。」學友透露太太睇過一場，兩個囡囡看了兩場半，其中一晚早離場，由於今早要返學，他們在昨晚尾場都不會到，學友笑問記者是否很失望，又強調太太OK，好Fit，囡囡因之前已看過他做騷，所以沒有特別緊張和評語。
送上利是賀母親節
學友自爆最緊張是媽咪來捧場的一晚，他說：「媽咪在母親節前一周來捧場，佢坐在前面，我見到佢時便送上飛吻，點知飛吻送出腦裡突然空白，正在演繹的《只想一生跟你走》的歌詞都忘記，呆著站在台上，最後要從頭重唱，這首歌點會唔記得歌詞，可能媽咪少看我做騷，令我特別緊張。（見到老婆都會咁緊張？）我見唔到佢，但見到女兒。」
剛過去的母親節，學友因要開騷，未能抽空同媽咪慶祝，他說：「母親節佢仲幫我睇住兩個細路。（有無送花和禮物？）邊有時間買，我送上利是，好市儈，哈哈！（有否送禮物給太太？）佢直頭無啦，都無乍型，因女兒代我同太太慶祝。」
|
放大圖片
