 放大圖片
■千嬅大爆樂仔要求她介紹女仔做老婆。
香港文匯報訊（記者 梁靜儀）楊千嬅與余文樂昨日為新片《春嬌與志明》宣傳，大會為遷就身懷六甲的千嬅，安排她坐凳接受訪問，余文樂笑言多得千嬅帶挈，做宣傳都做得好「嘆」。千嬅又大爆樂仔想結婚，要求她介紹女仔做老婆，而樂仔則大爆千嬅是「奶奶殺手」。
活動上大會又安排粉絲玩遊戲，用泥膠搓成一件物品，然後讓千嬅與樂仔去估，其中粉絲搓成男性器官一樣，樂仔即叫他收埋去。千嬅自有BB後，每次出席公開活動，老公丁子高都會傍實老婆，昨日他不用上班，卻沒有陪老婆開工，千嬅即乘機「偷食」薯條。問到千嬅是否呼吸自由空氣？她笑道：「我偷食薯條，偷食係人之常情，(不怕老公鬧嗎？) 都食咗咯。」而樂仔就笑她日日都偷走呼吸自由空氣。
緊張回答擇偶條件
懷有五個多月身孕的千嬅，表示完成《春》片宣傳後便休息。對於被讚懷孕後靚了，千嬅卻嫌自己肥了，而樂仔亦讚她sharp了。千嬅即對樂仔說：「你都快些娶返個，快些到你(做爸爸)，本來有安排(相睇)，但有咗唔方便，因為要做大龍鳳，好多人都睇中佢。」說到他們很早已合作，樂仔之前可有叫她介紹？千嬅笑指初時怎知樂仔是否有女朋友，到拍續集他至話想正正經經拍拖及結婚。笑問千嬅是否樂仔之前不正經？她笑說：「我唔知咁多。」
樂仔被問到擇偶條件時，他即緊張到不停抖腳，又笑稱想到這些問題就緊張。千嬅就取笑他：「拍咁多床戲又唔緊張，而家就喺度『印』。」不過千嬅笑稱自己作為過來人，相信樂仔擇偶條件要錫伯母，因為之前去北京拍戲，樂仔都有帶埋媽咪及妹妹去，又陪媽咪周圍去食嘢。樂仔就笑指擇偶條件要似千嬅一樣，千嬅即得戚的說：「呢個世界唔係咁多個我，你識得我遲。」樂仔強調擇偶條件一定要長頭髮，問到他可需要長腿時就沒有回應。
爆千嬅是「奶奶殺手」
問到千嬅可有朋友介紹給樂仔時，她謂自己朋友一定年紀大過樂仔。問到樂仔可接受「姊弟戀」？他即說：「OK的，我又唔介意。」他又提醒千嬅要幫他「放風」，指他是筍盤，現割價求售。他又大爆千嬅是「奶奶殺手」：「千嬅見到我阿媽就會講『Auntie 點先？』呢招去到邊度都唔使乞食，修為好高。」千嬅就解釋這是尊重，又讚他對媽咪好。
|
放大圖片
