 放大圖片
■愛挑戰不同角色的黃智雯近年成功「入屋」。
近年TVB花旦中，黃智雯（Mandy）是比較突出的一個。明明是靚女一名，卻勇於嘗試，不停地演一些未必討好，但令人印象難忘的角色。加入TVB 6年，去年憑《缺宅男女》中飾演巴辣人妻婁笑蘭（關二嫂），人氣急升，獲得本年度台慶頒獎禮的「飛躍進步女藝員」大獎。成功上位後，31歲的Mandy除了望事業更上一層樓外，也渴望35歲前結婚生BB。問到伊人是否蜜運中，雖然黃智雯沒有明言，但看她的笑容，似乎有搵嘢！
熒幕中的黃智雯角色多變，現實中的她性格如男生般爽朗，對愛情有一份憧憬。未入行前，Mandy做空姐，前男友是西裝骨骨的生意人，2人於機上一見鍾情，繼而拍拖4年。聽落好老土的劇情，之後的劇情更老土。因為Mandy入行後工作忙，男方又是圈外人，並不了解女友的工作情況，彼此聚少離多下，4年情最終宣布結束。自言入行後一直單身的她，已經準備好隨時期待新戀情出現。「我今年突然想通了，以前知道朋友有男仔介紹畀我，我會搵藉口唔出去。今年突然想通了，和男仔吃飯都好平常，是正常的社交。現在我都有和異性約會，擴闊下生活圈子與人際關係。大家都以為藝人容易識人，其實仲難。」
既然Mandy大方講拍拖，不如談談其擇偶條件，「我份人對感情幾認真，不喜歡拍散拖，如果開始得的人就想佢係the one，我希望35歲前結婚生BB，現在還有4年。男朋友不需要有錢，最好是圈外人。思想上的溝通比外表更重要，傾到偈，要合眼緣。我相信緣分到，呢個人會出現。」其實身邊有朋友向筆者報料，說見到Mandy跟異性吃飯，不禁直接問她心中的Mr Right是否已出現？「唔係㗎，不過身邊係有條件又傾得埋的人出現，了解中，咪亂寫嚇親人。如果將來拍拖，又被傳媒影到，我會大方承認的。」
參選港姐不求奪冠
黃智雯07年參選港姐，決賽當晚進入最後5強，三甲不入落敗後加入TVB，當年冠軍是人稱「豬扒港姐」的張嘉兒。說到當日選美心態，人家一心想贏，但Mandy卻求神拜佛不要贏冠軍，認真令人匪夷所思。「25歲去選港姐入行，好多人話我起步遲，其實選美只是入TVB拍劇的捷徑。當年我在讀演藝期間，停學2年做空姐，之後再復學。我想學以致用入行做戲，選美入TVB拍劇是最好的方法。當年身邊的佳麗同外界都睇好我，話我會贏。但我一心入行拍劇，入最後五強，我還求神拜佛不要贏冠軍，不要給我太多麻煩。因為如果贏會被大家『起底』會失去好多自由。現在諗返轉頭，才覺自己蠢，如果有個名銜，呢條路應該會易走一點。」
「金子」到哪也發亮
其實Mandy哪用後悔，只要有實力，也能發光發亮。由《巴不得爸爸》的「鳳蓮妹」、《搜下留情》的「鵪鶉妹」、《缺宅男女》的「關二嫂」、《On Call 36小時》的「美雪」、《女警愛作戰》的「Madam Kiu」，到今次《好心作怪》的「夏思嘉」以上角色都有一個共通點，全是不討人喜歡兼不賣靚樣的角色，做不到高登女神，反而是她的優勢。「入行初同Flora（陳慧珊）拍《搜下留情》，佢的一番話，我至今仍記得。當時佢同我講『如果你想在呢行做耐些，個樣靚唔靚唔重要，你一定要練好內心戲，先可以觸動觀眾。』」
入藝員訓練班，畢業那天要自己做一個劇，「我知道台下好多監製同導演在當中揀蟀，是一個讓我表現自己的平台，不容有失。我自選一段扮小朋友的戲，其他人都做回比較貼近自己的角色，自然突出點，德哥（監製潘嘉德）都係睇完呢個騷先搵我做『鳳蓮妹』，開始有人留意我。我以前讀演藝，搶住做垃圾婆、癲婆，好玩又出到位，做演員唔可以專做討好角色。今次『夏思嘉』呢個角色，好13點，好阿Q精神。而且形象百變，一個好Funny的角色，監製叫我自由發揮，我同Bosco在片場互相交波，佢轉數好快，我們2人都過足戲癮。」
已經在事業上有成績，Mandy未敢自滿，攞獎只是當一個鼓勵，希望做好每個角色。「我好多嘢都未試，攞獎只是當一個鼓勵，攞完獎自己比自己壓力，會諗下點可以做好下一個角色，始終觀眾對自己有期望。而我終極目標，是希望有一日能重回舞台，做舞台劇。」
Info
採訪：植毅儀 攝影：彭子文
化妝：PhoebeYung Styling：Bernardo
|
放大圖片
