 放大圖片
■《神鎗狙擊》演員提早慶中秋。
——網民惡搞舔腳指相 香香嗌核突
香港文匯報訊（記者 梁靜儀）謝天華與徐子珊、張兆輝、岑麗香（香香）與溫家偉等，昨日出席TVB劇集《神鎗狙擊》宣傳活動，眾人分組玩遊戲鬥食中秋應節食品外，天華更戴上黑超，擺出「Chok」樣獻唱劇集歌曲，但就要偷睇貓紙。對於他告別TVB之作首周收視一般，天華認為正常，因為有新劇上觀眾需要時間了解吓。
《神》劇播出一星期收視一般，未能承接《衝上雲霄II》優勢，觀眾更批評劇中不乏誇張情節，如天華可一邊單手攀山，一邊聽電話，可謂神乎其技。一向愛「Chok」的天華解釋是因為想要更型，他笑說：「原本無講電話，係臨時同監製講想更『Chok』，增加戲的效果，令到個角色更大膽自信，咁湯告魯斯在電影入面都徒手攀山但就無講電話，咁我想型過佢嘛。」
對於「告別作」首周收視未有太大突破，他卻依然充滿信心說：「係正常㗎，因為有新劇上觀眾係要時間溝通了解吓，就等於識新朋友一樣，要了解吓先交得過。」劇中天華分別與子珊、香香及陳煒等均有感情線，可謂豔褔不淺，他卻得戚地笑指自己明益女方。
香香在日前播出的一集中有舔腳趾的戲份，事後被網民指核突，甚至有網民將其腳趾打格仔大玩不文，香香看到相片即皺眉大叫：「咁核突的腳係化妝整出來，今次拍劇大家都好努力，希望大家唔好將個焦點放在那裡，好似大家現在只將焦點放響身材同打格仔度。」
香香暗示溫家偉「無機」
近日被指力追香香的溫家偉（大隻仔），昨日被問到緋聞時，他緊張得不停捽手回應：「一向對佢（指香香）係好朋友，（可符合做你女友的要求？）可以嘅，呢個人幾好。」不過他否認有追求意思。香香亦同樣表示十分開心雙方目前是好友關係，更稱目前的狀態是想工作為主，擺明請大隻仔「食檸檬」。之後輝哥站在二人中間合照，輝哥更搞笑地問大隻仔：「會唔會阻住你哋呀？」大隻仔搞笑答道：「你知就好啦。」
身為女主角的子珊，對於氣勢被香香搶去不少風頭，她不但沒有介意，更認輸說：「抵佢搶鏡，佢拍得好辛苦，係正常㗎，一個女仔做飛虎真係好突出，而且佢好可愛。」劇中不乏動作場戲的子珊，則坦言不想走打女路線，她說：「因為做打女好辛苦，同好易受傷，但係個個都覺得我可以做打女，可能大家見我識跳舞。」
|
放大圖片
