 放大圖片
■黃芷晴(右)孖劉明軒主持有線《色香味主播室》。
香港文匯報訊 黃日華女兒黃芷晴最近接受有線奇妙娛樂台邀請，為美食節目《色香味主播室》擔任客席主持，她除了與劉明軒報道最新的飲食資訊外，亦不忘分享與家人相處的樂事。
一談到食，芷晴就滔滔不絕，她自言自己好為食，但可能是家族遺傳，她一向容易患腸胃病，對美味的日本刺身往往無福消受。她表示父母雖然工作忙碌，但每逢周日的「家庭日」，媽媽都會親自下廚，芷晴還「賣口乖」大讚媽媽的廚藝一流：「我媽媽識炮製好多拿手好餸，例如芝士焗龍蝦、煎牛扒，三哥、三嫂（苗僑偉及戚美珍）食完後都讚口不絕。我好有口福，每年生日媽咪都會親自下廚，炮製生日大餐畀我。至於爸爸通常都『動口不動手』，負責等食。但有次我病得好犀利時，爸爸竟然動手煮通粉畀我食，佢真係一個廿四孝老竇，令我好感動。」
黃芷晴表示自己也遺傳了媽媽的廚藝天分，閒時會邀請一大班朋友到家開派對及燒烤，最叻炮製巴馬火腿及鵝肝等美食招呼好友。黃芷晴又難忘多年前曾到爸爸的好友劉德華家中作客：「初中時跟爸爸去過佢（劉德華）屋企食飯，劉爸爸仲親自煮鮑魚畀我哋食，令我好難忘。」
問芷晴首次出任飲食節目主持的感受，她表示：「開頭有點緊張，搞到狂食『螺絲』。好彩之後越做越順暢。我讀大學時主修設計，性格比較文靜，與人交流的機會不多。希望日後再有機會做主持，藉此訓練口才及應變能力。」
|
放大圖片
