 放大圖片
■仁濟醫院就職。蘇太被蘇生攬住，笑意盈盈。 彭子文 攝
蘇陳偉香以一襲綠裙白外套亮相，老公蘇啟聲卻在台下輕鬆觀禮。更與記者閒話家常，蘇氏伉儷事業生活兩得意，幸福家庭，恩愛夫妻羨煞旁人。
記者問蘇生，太太做主席會否影響生意？他話：「唔會，佢有佢做，我有我做。」再問打算點樣捐錢支持太太，佢又話：「點解要我捐錢啊？我又不是坐在台上那位。」鬼馬的佢話鋒一轉補充說：「我哋兩公婆，其實是共用一個戶口，各有各使，財政獨立，大家使錢都唔使問對方，佢鍾意點使就點使啦，佢咁叻女，大把水啦！」問他送什麼禮物賀太太，佢又反問記者：「點解我要送禮物畀佢啊？家吓我又冇得威，係佢做主席，佢送禮物畀我就差唔多。」他笑謂：「我哋唔使做埋呢啲表面嘢啦，大家好多嘢都心照！」
三代同堂捧場觀禮
蘇生透露，兩個仔女均有到場，囡囡一家3口到齊，仔仔同新抱來。蘇生講到孫兒一臉幸福，兒子為蘇家添了一個6歲孫女，一對3歲孖仔；囡囡則有個3歲女。3歲外孫女好精靈，知道婆婆做咗「仁濟一姐」，在台下好興奮，見到婆婆拿獎，拍晒手掌。蘇太囡囡透露，乖女準備畫幅畫送給婆婆當禮物。
蘇氏伉儷為潮州人，出名做生意叻，在東莞開廠做手袋及女士用品，近年開始轉型，將推出自創品牌，取名「Freepers茵菲莉」的嬰兒尿片，工廠設在東莞，營銷總部設在上海，不過要到8月才有得賣。雄心勃勃的蘇生更透露準備上市添。
蘇生識做生意又識享受，他有幾隻馬，「共創美好」已跑了3季，表示來日出賽記者有興趣可以一起入馬場玩。問他養馬多年可有斬獲，他則話：「香港馬主99%是蝕錢，只不過養馬是香港社會的一個特色，一種延續下來的生活習慣和情趣，也被視為身份象徵。自己有興趣就玩吓，但就唔會教人買馬啦。」
忙得不可開交的蘇太，當記者問佢打算送什麼禮物給老公，佢好愕然咁話：「點解我要送禮物畀佢啊？梗係佢送畀我啦，仲要佢捐多啲錢畀我添！」原來兩公婆好有默契，聽到太太咁話，蘇生笑笑口攬住太太膊頭影相。蘇生本來打算錫太太，蘇太即話：「哇！呢啲嘢，唔好啦！」但就笑得好開心。
典禮嘉賓眾多，但蘇太應付自如，將每一細節安排得滴水不漏，連影大合照攝影師都要「沒收」靚太放在椅下的名牌袋、整理好椅套，一張相足足花了幾分鐘。看來蘇太執掌仁濟，大家都要打足精神開工啦。 ■香港文匯報記者 解玲、鄭群
|
放大圖片
