 放大圖片
■Miu姐過着優閒的生活，因監製陳維冠一次通電話而復出。
曾志偉做監製的《M Club》坊間評價甚高，其中飾演李若彤「惡奶奶」的苗金鳳（Miu姐）更獲大家激讚。別看Miu姐在劇中對着李若彤粗聲粗氣、大聲夾惡，現實中的她並非一個野蠻奶奶，2個媳婦跟她似朋友相處。■撰文﹕植毅儀 攝影﹕黃偉邦 場地﹕都會海逸酒店
息影十六年的苗金鳳，復出拍攝無綫的《M Club》，其野蠻奶奶形象深入民心。過去十幾年，Miu姐過着優閒的生活，閒時約朋友食飯行街，卻因監製陳維冠(Joe)一次通電話而復出。事前已講明既不要辛苦，也不要臨時出劇本。「Joe有日打電話畀我，話見到我上高志森個節目，佢有個新劇，有個角色好合我去演。我一聽就已經話沒興趣，監製追加誠意，約埋編審同我出去飲杯嘢一齊傾，我事先講明要出到8成劇本，同唔可以太辛苦才演，監製及編審都保證不辛苦。點知一出來拍劇，真係未試過拍得咁舒服。平均可以在晚上11、12點收工，只試過一次要凌晨4點才收工。人人都話我復出，其實都不是重出江湖，主要是劇本適合，加上監製及編審的誠意邀請。在此我真的要讚下編審，她們好比心機去寫劇本，令個人物好突出，我去街市買菜，街坊追問我劇情，編審應記一功。」
無心插柳入行
苗金鳳是上世紀六十年代粵語片最紅女星之一，她擅長演繹楚楚可憐的少女角色。成名作為1966年與張瑛合演的電影《一水隔天涯》，其後在多部粵語長片中擔任重要角色。說到入行經過，Miu姐坦言是無心插柳入行。「年輕時我住香港島，有日有個朋友叫我去九龍行街，之後又話叫我陪佢報名電影公司招募活動。那時我家規好嚴，自己也沒做明星的念頭。如是者2星期後，電影公司打電話來話叫我去鑽石山片場試鏡，我已經表明唔會去。點知道又2星期後，電影公司老闆竟親自來電，話只有我一人未去試鏡，我話沒興趣演戲，也不知鑽石山片場在哪，點知老闆竟然話就我回九龍的辦公室試鏡，我也只好接納好意。在試鏡當日，我專登穿到黑衫、黑褲無打扮上去，演出時亦不見落力，最後竟然取錄我。最好笑的是新人簽約，合約寫明不准拍拖結婚。一看合約要簽六年，以前流行早婚，簽六年怎嫁人？我嫌年期太長，口多多講價三年，老闆竟肯簽，自己唔好意思推勉強簽約入行。」
和新抱保持距離
人與人之間的緣分就是由天定，Miu姐的合約寫明唔可以拍拖結婚，但首任老公就是自己所簽的港聯電影公司老闆劉芳，婚後2人育有兩個兒子，一個做成衣生意，一個做建築。Miu姐現時獨居將軍澳，提到與新抱相處，她強調自己現實生活裏絕非惡家婆。「大仔在加拿大生活，個孫仔都已經十三歲。細仔四年前結婚，一早講咗唔想生小孩，但我好想他有。記得細仔未結婚前，話將來婚後同我一齊住，我當時心諗唔好啦，幸好佢婚後同太太搬開咗，現在得閒就回來陪我吃飯。始終相見好同住難。我對新抱好客氣，我個細新抱在公司都俾人叫做李若彤，同事們成日問佢有冇俾奶奶蝦。」
|
放大圖片
