 放大圖片
■奧雲教黃翠如(左)與王敏奕(右)控球技術。彭子文 攝
香港文匯報訊（記者 植毅儀）前英格蘭名宿奧雲昨日到將軍澳出席「東港城 x英格蘭超級球星奧雲簽名會 」，吸引逾千市民圍觀。不少粉絲熱情地大叫奧雲的英文名，奧雲也舉手打招呼及用中文講「大家好」，十分親民。奧雲又即場示範超凡球技及教黃翠如、「少女版朱莉」王敏奕控球，對於2人表現，奧雲讚翠如是「Very good」，但王敏奕就「only ok」。
前英格蘭足球名將奧雲昨日於東港城舉行簽名活動，吸引到逾千名市民圍觀，場面熱鬧。其他出席活動的嘉賓包括黃翠如、「M Club」成員賴慰玲、陳嘉寶（Anjaylia)、王敏奕（Venus）及何廣沛等，其間奧雲即席示範控球技術，又拿部分獎牌與觀眾分享。奧雲十分親民，同小朋友影合照又摸帽，收高層禮物時更禮貌地攬一攬對方。奧雲又用普通話打招呼說：「你好」，再用英文講：「好開心再來港，香港好好玩。」
奧雲又親身指導黃翠如及王敏奕控球，只見翠如控球有板有眼，表現不俗，Venus卻不時跌波落地，當司儀問奧雲覺得邊個好？奧雲就指翠如「Very good」，但Venus就「only ok」。5位藝人上台和奧雲影大合照時，趁機把自備的衣服、道具足球給奧雲簽名及爭相與他握手。
奧雲受訪時透露將結束為期一周的亞洲之行，今次未有與家人同行，太太就留在家中照顧細路，望他日後帶同4個子女來港。奧雲大讚香港粉絲好熱情，問到最愛香港什麼食物？他說：「點心及法式多士。」奧雲又透露上次到沙田馬場觀賞賽事，以為下注是不合法，希望明年再來港，有機會入場下注。
翠如忘記幫父親攞簽名
黃翠如於後台接受訪問時表示，她能與奧雲握到手開心到暈，笑言打算不洗手，取得簽名後表現興奮，笑言有不少家人支持英超曼聯球隊。翠如又自爆爸爸曾叮萬囑要帶球衣給奧雲簽名，但自己忘記了，擔心爸爸會嬲，而剛剛取得簽名的道具波已被工作人員拿走，希望能夠取回。
問會否抽空睇波？翠如說：「我係半專業球迷，到時會留在屋企同家人一齊睇波，我有5姊妹，加埋父母可以穿好多唔同國家的波衫。（同男友蕭正楠睇波？）唔同佢睇，同屋企人睇！（驚係見到你失儀個樣？）我一向沒儀態可言，同班姊妹睇波係女人的浪漫。（見咗家長未？）唔諗到咁遠，但我在此希望傳媒高抬貴手。因為上星期有記者騷擾到我媽媽，前2日又嚇倒妹妹！（搬出去住？）我黐屋企人多點......但我冇想過現在會攪到他們。」提到心水球隊，翠如撐巴西隊，因其有主場之利，更有新一代球星尼馬，希望可以在球場上看到他用腳法表演魔術！
陳嘉寶為見奧雲棄外遊
陳嘉寶表示原定請假外遊，最終家人及男友一聽到她有機會見奧雲，就叫她不好放假，認為見奧雲的機會十分難得。Anjaylia 說：「我帶了奧雲名字的球衣給他簽名，本身打算帶寶麗萊影相，但同事話咁做太瘋狂，我覺得奧雲靚仔又係好好先生，其次我就鍾意美斯，因為佢好有實力，世界盃我支持阿根廷。」
賴慰玲大讚奧雲在世界球壇地位出眾，極具代表性，而碧咸則是球壇Icon。而「少年版吳啟華」何廣沛是一名老球迷，已經看了20年足球，雖然曾到英國「朝聖」，但能夠近距離接觸球星則屬首次。問喜歡哪位球員？他說：「簡東拿，但已經退咗休，世界盃就支持意大利，因為後防好叻！」
王敏奕表示都有工作關於世界盃，所以會跟大家一齊睇波，Venus笑說：「今年第一次睇世界盃，四年前仲讀緊書，我會支持西班牙，因為多靚仔，仲有C朗！」當記者提醒她C朗是葡萄牙隊球員時，Venus以笑遮醜說：「係咩？其實睇波係睇氣氛，C朗同碧咸都好靚仔，奧雲就未見過真人，都好靚仔！（男友曾國祥有睇波？）唔知道，只知佢有打籃球。」
|
