 放大圖片
■Bob投資百萬港元與朋友合資成立廣告製作公司。
在TVB台慶劇《老表，你好hea！》中飾演郭寶的林盛斌（Bob）以朝鮮領袖金正恩造型現身，和陳嘉佳（細細粒）激咀15分鐘，夠晒搞笑。很多人覺得Bob時來運到，做DJ、主持、婚宴商演司儀到拍劇，一日24小時都不夠用。其實是Bob懂安排，未雨綢繆，Bob半年前投資百萬港元與朋友合資成立廣告製作公司Chessman H.K.，為家中4母女過優質生活而打拚。■採訪、攝影：植毅儀
訪問是在Bob位於觀塘創業街的3千呎公司進行，看看他雙手遞上的名片，職位是Chessman H.K.董事總經理（MD）。成立公司，只因為Bob明白到花無百日紅的道理，自己已經35歲，想為家中3個小公主及太太的生活鋪路。
成功升呢做CEO
「之前一直都有朋友問我有沒有興趣搞公司，我都覺得未係時候。直至去年底，在澳門有13年歷史的Chessman想擴展香港平台，我同合夥拍檔一拍即合，各投資7位數字在香港成立兄弟公司。好多人可能想找我接job任司儀，但時間同價錢未必合適，咁由我介紹畀其他人。跟住客戶又想我度埋廣告，開間自己的工作室，會有好多Back up。況且呢一行係花無百日紅，可能今日我好多嘢做，但明年又有另一個人爆出，可能已經冇人搵我做嘢，有自己的製作公司，對我及家人來講，係一個好好的保障。由接廣告、度橋，甚至搞製作統籌，落埋廣告一條龍服務，仲會以老闆身份親自去見客，畀到信心客人，所以呢幾個月接觸好多品牌老闆。So far，公司成立短短3個月，盈利已夠交一年的租金。」
接job講良心有底線
認識Bob是在5年前，偶然機會下先認識他的太太，繼而再認識他。曾聽過TVB監製Ken哥講，阿Bob不怕蝕底。那時候要開節目《Big Boys Club》，但因為J2是新台，拍膊頭找Bob幫手。「我好信因果，我做人第一宗旨，就係：『只要你撐我，我就一定撐你！唔使講嘢。』09年監製找我幫手，我時間就到，咪幫吓手。做人就係咁，做《兄弟幫》，令我認識了其他監製、導演，可以上TVB其他節目，令多些人認識我。好多人覺得我襟撈，咩工作都接，但我有自己的底線，像早前有個客搵我拍胸圍廣告，要我戴住個Bra夾條事業線拍廣告，我覺得Over咗。仲有個廣告搵我整容，要我成塊面每個部位執，要我變成面尖尖，變尖就唔係阿Bob啦，再者我覺得自己個樣幾靚仔啊！過唔到自己良心的事，我唔會做。」
低潮靠《老表》翻生
看着阿Bob一身打扮，戴金鏈、金耳環、金勞，他坦言早幾年有師傅教他戴金器個運會好，結婚初戴起，這幾年是「行好運」，事業發展順風順水，發過豬頭。雖然已經忙不停，仍不忘記宣傳《老表，你好hea！》，只因人生低潮拍了劇集《老表，你好嘢！》，令自己上位。兩年後拍續集，更成為重頭男角。
「2年前因為雜誌封面影到我上唐樓揼骨同買成人光碟，工作量即時跌咗，剛好祖藍問我有冇興趣拍劇，當然立即應承啦。拍了第一集，演技大受好評，隨後演出工作不斷，也才有現在的續集。所以你記得幫我寫多些《老表，你好hea！》，好好笑㗎，造型就極似朝鮮領導人金正恩，劇中我係一個偽文青。而且我同會細細粒打破電視史上接吻最長鏡頭的紀錄，仲要係一take過，由房錫到去廳、再返入去房。最大件事這是細細粒的初吻，不只是熒幕初吻喎！是真的初吻呀！另外，劇中我仲有機會嘴對嘴親吻女神萬綺雯，連老婆都話監製明益我！」
妻做強大後盾
03年由陳小芝介紹入新城做廣告部，短短半年已經跑到好好的業績，後來覺得做廣告沒挑戰，轉職做DJ，由執頭執尾慢慢到報交通講天氣，捱足10年，成為今日的CEO。努力背後，Bob最多謝太太在背後支持，撐起頭家，令他可以在外打拚。
「家中有6個女人，老婆、3個女、2個工人姐姐。太太現在全職湊女，我好感恩有這個好太太照顧屋企。好多人問我是否想追個仔，其實我覺得一個家庭有3個小朋友才開心。3個女各隔3年，像大女霏霏現在讀小學，見到我在家會唱歌給我聽，二女熹兒一見我入門口就飛撲出來攬着我。現在盡量安排時間參加個女學校的活動，有些事錯過了就未必可以返轉頭。同埋盡快與太太拍結婚照和度蜜月。」
|
放大圖片
