 放大圖片
第二場、第四班、一二○○米。「樂趣」今季跑過三場雖仲未有威脅性演出，但直路總有段追勢，尤其是前仗出戰田草千四米，早段留在尾疊跟跑，入到直路開始踩油上前，立刻追回不少失地，終點前趕過上季能贏四班的「新界福星」跑得第六名，呢場已表現出隻馬有好大進步；上賽再增程二百米，雖然名次退步，但能跑贏其後已勝的「進攻足球」，再次證明本身已有一定戰鬥水準，現轉戰谷草對手減弱，絕對有能力一爆。
第四場、第四班、一六五○米。「新寵」雖然紙上賽績冇乜睇頭，因為來港跑咗十二場只得一席第三，該仗是上季604場次出戰谷草千二米，以三個幾身位輸俾「幾叻仔」得第三，但在其後過終點的「愛寶」和「天地福星」之後都可以在四班交出頭馬，以當時狀態完全唔起眼的「新寵」，能將牠們擊敗而取得上名成績，證明是有一定前景，現評分比起當時少咗七分，在四班負輕磅有冷味。
第五場、第四班、一六五○米。「萬眾期待」雖然跑咗三季仲未出頭，但一再於同程有出色演出，好似上季269場次以頸位之微輸俾「勝算高」得亞軍，後駒之後在同程再贏多兩場；季尾625場次更是與「明珠一號」鬥至影相分勝負，以呢兩場水準計已可肯定隻馬在四班跑此程是有極強殺傷力，只要遇到好形勢，便可吐氣揚眉。
|
放大圖片
