 放大圖片
■余文樂今次投資7位數做生意。
條件勝從前10倍 99%續約寰亞
香港文匯報訊（記者 梁靜儀）早前有傳余文樂約滿寰亞後將不再續約，昨日阿樂出席活動時透露百分之99會續約，並透露今次續約條件比之前的好10倍。今日33歲生日的他，表示會跟家人食飯慶祝，並透露希望早日結婚生仔，讓媽媽有孫湊。
樂仔的自家品牌MADNESS位於中環元創坊的POP UP STORE昨日舉行開幕活動，穿上自家品牌出席活動的樂仔，表示今次投資了7位數，自己亦有份設計。
問到會否向好友沈嘉偉取經？他說：「嘉偉一向有教我做生意，我無問太多，一步一步嚟，(是否同行唔方便問？)唔會，佢大咁多，我啲蚊型，覺得拍戲容易過做生意。」他指時裝店由7月籌備至今，在人手及時間方面都超出預算，稍後亦會跟其他品牌合作。笑問他是否要追貼沈嘉偉？他卻稱拍馬都追唔上：「追一世都追唔切，不過成績同收入都比預期好，但我會keep住拍戲，唔會只做生意，呢個係我興趣。」自言數口不精的樂仔，表示媽媽原定退休不再做，但現時亦會幫他手。笑問到伯母是否做生招牌？樂仔笑道：「下個月執㗎喇，媽咪幫我睇數，因為佢以前做開生意。」
寧細水長流續約
早前有傳樂仔嫌公司發展空間少 ，擬約滿寰亞後不再續約，問到續約問題，樂仔大方回應將會續約。他表示公司及林生(林建岳)都對他很好，5年前沒林生就無今天的他，而且他很怕轉換新環境，雖然有很多人找他合作，而開出的條件及價錢都很高，但他不是睇錢至上，因為錢可以搵得返，但工作環境及感情就搵唔返。問到他覺得公司的發展空間是否足夠？他說：「無一間公司係完美，視乎自己要乜，我要細水長流，合作似一家人緊要過錢，而且老闆開的條件好好，現在我99%留低，1% 未簽新約，新約比之前的好十倍，我好滿意，大家唔使揣測，人夾人緣，相信緣分，任何人都有走有留。」
祝福舊愛吳雨霏覓良緣
今日是樂仔33歲生日，問他如何慶祝？他表示現時不喜歡慶祝，只會跟家人食飯便算，以往愛喝酒的他笑道：「好怕要飲又要嘔。」 會否買靚車送給自己？愛車的他竟然耍手：「唔好洗錢喇，要儲錢，都唔知幾時有需要，我咩都有，(但你無女朋友？)我都好想結婚，我阿媽恨抱孫，佢之前去完泰國旅行，返來同我講話唔介意我識個泰妹。」
另外，他的舊愛吳雨霏近日與網球手男友復合，並透露已準備好結婚。樂仔聞言大方表示祝福對方，覺得女人最重要是搵個好的另一半，無論如何都會祝福她，分開不等於唔可以做朋友，他日自己結婚都想別人祝福。
提到他的隊友周柏豪也是今個月生日，樂仔指柏豪比他早一日生日，自己也有在instagram祝他生日快樂。之前有傳二人不和，但樂仔表示與柏豪有共識關於不和的傳聞都不講。
|
放大圖片
