 放大圖片
喺九月份姚本輝馬房已贏咗三場頭馬，短短半個月賽期有咁嘅成績經已唔錯，但到咗十月份，唔係靠隻超級馬「包裝奔馳」贏番一仗，相信大家都估唔到，十月份跑咗九個賽馬日，姚本輝馬房係幾乎食白果咁慘。本來運氣嘅嘢只屬一輪一輪，但大家睇睇今個十一月，眨吓眼又冇咗半個月，姚本輝依然停留喺四場頭馬成績，連吳定強及李易達都經已追咗上嚟，假如呢個局面唔快啲解決有轉機嘅話，姚本輝可能又再經歷一沉百踩，世態炎涼嘅情景。所以大家睇一睇今次夜賽，姚本輝馬房雖然只係出五駒，但當中四隻係由歐洲大師傅操刀，另外一隻留番俾今季手風甚順嘅何澤堯，驟眼睇呢個格局，顯然知道姚本輝經已抱一個打硬仗決心。
近日有兩隻姚廄馬，馬房備戰動態都好緊張，呢兩隻就係「正白旗」及「樂在其中」，兩駒喺剛周日下午安排到機坪踱步，呢個時候太陽都幾曬，但係倉主亦親自到機坪睇馬，「樂在其中」由副練踱，「正白旗」則由談樹文試，試完之後，倉主立刻上前睇馬及聽馬呼吸。「樂在其中」季內跑三仗全部入三甲，不過馬房話呢隻係正宗懶鬼長途馬，今次跑一哩實在稍嫌短，人哋隻隻衝晒過終點，佢未必及時撻得着，所以最多都係睇位置。不過嗰隻「正白旗」上仗跑谷草千八米，狂放大敗十六個馬位，從以往成績所見，呢隻馬最佳出路係千四米，一哩都曾有贏馬賽績支持，跑千八米當然略長，不過呢一仗千八米可以視為熱身賽，今次用艾兆禮級數高過上仗楊明綸多多聲，並且跑番一哩合發揮，係有多少出冷機會。
電光火石千八發威
再講另外幾匹姚廄機會馬，當中郭能仲有替「栗池駒」及「電光火石」披甲，而據班手足講，兩匹馬之中，「電光火石」狀態係非常好，呢匹馬上次喺田草千六米跑入第二後，成隻馬經已成熟過來，而馬房亦對呢隻馬非常重視，喺周一下午，倉主特別安排兩匹戰馬喺地堂踱俾佢睇，然後再教埋閘。「電光火石」由談樹文踱及「金像神話」何澤堯，兩隻馬踱起嚟神態生猛，「電光火石」狀態比起上場更勇銳，大家睇一睇，今次夜賽呢匹「電光火石」係有一哩出戰，但馬房知道佢係隻長途馬，所以左揀右揀，終於棄一哩而進軍千八米，相信今次可以一睹「電光火石」真正威力。
金像神話堯仔加課
其實同「電光火石」一齊踱俾姚本輝睇嘅「金像神話」，係倉主專登搵人叫何澤堯喺馬房策踱，假如唔係有一定機會，倉主點會勞師動眾，專登擸何澤堯返倉替呢隻「金像神話」踱步。今次呢隻「金像神話」再跑谷草一哩，其實上場用郭能出戰呢個路程，臨場由十一倍跌到七倍跑，結果鬥衝得一席梗頸四，只輸半個馬位，睇腳法一哩當然適合，但郭能負一二○磅跑，確實未見有乜嘢上風可佔，所以今次換個何澤堯上去，多減兩磅得兩磅，現今只負一一五磅上戰場，用何澤堯一樣有唔錯爭勝機會，經一場仄準谷草性能後，今次排個有利三檔起步，應係出擊目標。
|
放大圖片
