 放大圖片
■苗金鳳(左)接受主持汪曼玲專訪。
香港文匯報訊 苗金鳳（Miu姐）亮相有線《星級會客室》接受主持汪曼玲專訪。Miu姐從六十年代黑白粵語片起加入影壇，其後轉型到電視圈發展，自98年息影後過着養尊處優的生活，近期又回到觀眾眼前，參與電視劇和舞台劇演出。
Miu姐經歷過兩段婚姻，坦言對婚姻再沒有憧憬，回復單身的她反而活得更自在：「結過兩次婚，乜都試過晒，我對婚姻無乜期望，反而覺得現在有空間幾好。最開心係兩個仔都大晒，結埋婚有埋小朋友，個孫都13歲，好可愛。」她表示細兒子特別孝順，令她倍感安慰和開心。
提到年初回到幕前接拍電視劇，Miu姐指是興之所至：「我98年決定息影之後，都無諗過再出來拍劇，因為真係好辛苦。今次都唔算叫復出，只係當做玩下，監製同編劇好有誠意，特登約我出來傾劇本，我覺得個故事幾有趣，加上佢哋答應我唔會好辛苦，所以答應演出。不過咁耐無拍劇，記憶都退化晒，返到屋企要不停讀熟對白。」
嘉玲主動攀談感窩心
除了拍劇，Miu姐近期亦參與梁家輝、劉嘉玲和謝君豪主演的舞台劇，她分享合作趣事：「第一日開會，我去到現場個個都唔識，咁啱遠處有個戴太陽眼鏡、着到成身黑色的女士行埋來同我點頭微笑，我未同佢打返招呼，點知佢突然攬住我講：『Miu姐，你好！』我當時嚇一嚇問佢係邊個，佢話係嘉玲，我問咗兩次邊個係嘉玲，之後佢拎開副太陽眼鏡我先認得。現在諗番起都覺得非常唔好意思。」她又大讚劉嘉玲為人友善，會主動找她吃飯聊天，感覺窩心。
Miu姐被問到會否繼續幕前演出？她表示：「完埋一月份的舞台劇演出，暫時應該係繼續休息。現在我鍾意同朋友周圍去旅行，不過通常係去附近的地方，因為坐五個鐘頭以上嘅長途客機太辛苦。」
|
