 放大圖片
■太陽昨日現身香港出席活動。梅馨文 攝
韓國天團BIGBANG成員太陽，昨日分別現身尖沙咀及銅鑼灣SOGO。現場吸引300名粉絲支持，部分粉絲更企到對面馬路，有半百保安及警員在現場戒備，場面噓冚。太陽被問到早前在北京出席頒獎禮，於台上跌親一事，太陽直言當時自己嚇了一跳，好醜怪，想搵地方鑽！
頭戴黑帽並着上啡色褸的太陽昨日先去尖沙咀間SOGO進行開幕儀式及亮燈儀式，太陽於台上十分友善，全程微笑。劉鑾雄、女友甘比、大劉細妹及母親都有現身支持，完成儀式後，太陽就接受傳媒訪問，不過現場安排就有點混亂，因為要他用咪分別答文字傳媒及電子傳媒問題，搞到太陽都有點尷尬，而訪問過程，枱上面手機突然響起，貪玩的太陽即拿起來講了兩句說話，十分搞笑。
跣低想搵地方鑽
說到大家都好關心早前太陽於北京出席頒獎禮不小心跣低一事，他說：「個舞台太跣，都冇辦法。自己都嚇了一跳，好醜，想搵地方鑽。巡唱已經準備得七七八八，唔會因為聖誕而唔夠時間準備。（香港演唱會可有嘉賓？）我好期待，但要保持秘密。」
太陽首《EYES,NOSE,LIPS》好受歡迎，亦都有不少人翻唱，同埋扮他MV的演出，問到他覺得邊個演繹最傳神時，他笑說：「我都知道好多人重唱我首歌，當中個個都唱得好好，不過覺得劉在石唱得最好，我有睇返，佢做的準備功夫好多，亦每一分每一秒都有留意我每個動作，佢係最正。（你在《MAMA》頒獎禮連掃三個大獎，點同隊友慶祝？）大家都太忙，所以冇特別慶祝，但係BIGBANG隊友都分別有傳短訊畀我恭喜我。」
主動同fans握手
問到今年會不會同其他隊員開聖誕派對時，太陽表示到時會有演唱會，自己覺得最重要可以同粉絲度過，亦會想同隊友食餐好的聖誕大餐。太陽又識做地表示之前來香港太趕，未能購物，今次會趁機購買聖誕禮物，特別就會買禮物給《超人回來了》的童星Haru。
出席完尖沙咀開幕禮，太陽立即到銅鑼灣出席「TAEYANG簽名會」為100位幸運兒簽名。過程更主動和fans握手，十分友善，而完成活動後，太陽已經立即乘機離開香港。■文：Ivy
|
放大圖片
