張智霖圓妻夢 靚靚激動攬啜李敏鎬

放大圖片

■張智霖幫太太袁詠儀與李敏鎬合照。

香港文匯報訊 張智霖(ChiLam)和太太袁詠儀(靚靚)到內地參與的夫妻真人騷《一路上有你》，有份客串亮相的嘉賓屢爆驚喜，前晚輪到韓國超人氣靚仔李敏鎬出擊。眾所周知靚靚向來視李敏鎬為偶像，今次劇組玩到盡，先安排ChiLam夫婦去李敏鎬的母校考數學，ChiLam竟全部bingo成為學霸，之後靚靚再贏砌圖遊戲。

真性情的靚靚在今集節目大放光芒，當劇組帶她去首爾睇李敏鎬的《江南1970》首映期間，戲院突然熄燈，閃亮登場的李敏鎬不止向靚靚送花，更跟她來個親熱big hug，令靚靚激動得眼泛眼光不停尖叫「Oh my god」，她第一句跟李敏鎬說的就是：「你怎麼可以那麼帥的？」在院外正在吃爆谷的ChiLam忽聞劇組爆料李敏鎬會妻，只抵死笑問：「那我的全智賢甚麼時候來？」

至於靚靚亦十分搞笑，她嗌李敏鎬做帥哥，又叫對方嗌她做姐姐，結果怕醜的李敏鎬真的嗌了一聲姐姐，哄到靚靚笑不攏嘴，她甚至自爆「我真的很喜歡你」，能跟他合作扮演他的姐姐就是其願望。雖然靚靚直接表白，但ChiLam極之大方，還主動selfie自拍，又借機幫太太拍合照，靚靚把握這難得機會，更擺出嘟嘴偷吻甫士。