騎練軍情：勁飛揚態銳響勝鼓

放大圖片

雖然已過咗年，但有唔少馬房依然有春茗活動舉行，上個禮拜四「大運財」馬主潘蘇通喺沙田某酒店擺咗九圍，請晒高伯新馬房手足，仲有馬圈傳媒，一來作贏馬慶功，二來順道替馬房搞埋春茗，非常熱鬧，雖然同主隻「王者無敵」未必夠資格跑打吡，但另一隻同主馬「大印銀紙」則肯定可以正選上陣，而且韋達一早推庄「戰利品」並替「大印銀紙」出戰，由此可以睇到韋達幾咁重視呢匹馬。講番擺春茗，上個禮拜潘蘇通擺完，呢個禮拜四呂健威又有兩位馬主替呢個馬房擺春茗，呢兩位馬主喺今次夜賽都有份派馬上陣，分別係「勁飛揚」及「回鄉更好」馬主，喺聽日將於流浮山食海鮮，據知，只係招呼馬房兄弟及一些騎師或三兩位嘉賓，所以只擺四圍，規模比較細一點，倉主經已邀請咗杜利萊、潘頓及李寶利出席。

「勁飛揚」今晚有份上陣，跑完馬，馬主翌日擺春茗，請晒班手足食飯，馬房主理人當然唔希望令幕後失望，據悉，倉主及副練洪國興，近日最緊張兩隻馬，呢兩隻馬其中一隻就係「勁飛揚」，另一隻係「晨采」，呢兩日都吩咐策騎員下午必需替呢兩隻馬踱步兼教閘，所以狀態的確起得唔錯。

於第五場四班一哩列陣嘅「勁飛揚」，眾所周知呢隻馬只係識跑一哩，目前所贏四場頭馬有三場屬谷草一哩，另一場係田草千六，雖然田戰千六米都可以勝任，但威力一定唔及谷草一哩。「勁飛揚」今季只跑過一仗，當然本身有啲健康問題先至跑得咁少，但咪睇佢跑得少，今季出戰谷草一哩賽依然可以交出一席第四名，跑過呢場後，試一試健康冇乜大變化，今次賽前更試埋大閘而臨，已經有重振雄風本錢。

晨采搵莫雷拉交代

嗰隻出戰第三場五班一哩嘅「晨采」，季初仲喺四班田草千六米同「津津樂道」及「勝利雄心」跑近得第三名；上場落到五班跑谷賽一哩亦得第三名，輸俾「甜哥兒」及「金瀛」，後兩駒居五班屬半超級分子，反映「晨采」呢場得第三名一啲都唔失禮。如果計谷草一哩成績，「晨采」得五個第二名，兩個第三名，總共七次入三甲，上名率頗高，而呢隻「晨采」經已係第四季上陣，用過唔少好手披甲，但冇一個可以替呢隻馬打開勝門，今次馬房盡地一煲用雷神上陣，擺明車馬要向馬主代，戰意一層不用懷疑，今場更除去眼罩增添馬匹新鮮感，係有權贏馬而回。

善喜試閘譽滿欄邊

除上述兩隻呂廄馬有水準爭勝外，出戰第四場四班千二米嘅「善喜」，用到李寶利搏殺亦有不俗勝算。「善喜」季內曾經有兩場上名成績交出，均跑田草一千米直路賽得一亞一季，最近一仗馬房膽粗粗同呢隻馬出戰谷草一哩，結果係點，當然唔夠長力應付，輸四個幾馬位跑第八名，但跑過呢一仗後可以認定日後全熟嘅「善喜」必合中距離，但目前性能只係宜跑短途，復課後馬房俾咗個半月時間呢隻馬重新適應，上個禮拜撻課泥地千二米閘一放到底而回，可以話養番好火氣及水準爭逐呢場谷草千二米，頗具勝望。