 放大圖片
早兩日見到蘇偉賢同埋葉楚航齊齊出現公仔箱，接受唯唯及范振鋒所主持嘅兄弟幫訪問，兩位主持人似乎真係唔多識馬，所問問題，只係環繞住啲馬圈皮毛嘢，最到位嘢，都係問點樣可以入到練馬師呢一行，結果航哥介紹佢哋每年留意下馬會暑期招聘廣告，遇招聘見習生，不妨攞張表格試試，不過，強調要從一千幾百人中，揀三、四十人受訓，到最後可能得番兩三個可以做到騎師，另外，唔可以晉身騎師嗰批，即係講嗰三、四十人剩低嘅，有啲可以做騎馬人，仲有機會慢慢一步步晉升練馬師呢個位，但蘇偉賢再次強調，目前練馬師僅廿四個，只得一半由華人出任，舉例好似葉楚航咁，目前僅得四十幾歲，換句說話等佢到六十五歲退休，仲有好長時間，所以練馬師呢個位真係幾難有得做。好騎師當然難得，好嘅操馬人，亦都好難搵，假如有個操馬非常叻嘅騎馬人，各個倉都會爭住要。葉楚航強調，騎師唔同操馬人，騎師只要搏馬叻，仲舉例講隻「聰敏不凡」，雖然隻馬經常贏，而最合拍騎師屬潘頓，不過，航仔就嫌潘頓操呢隻馬，操極都留唔住，所以宜家唔會搵佢操呢隻馬，而呢隻馬轉由一個專人操練，所以，「聰敏不凡」宜家陣上出戰，頭段好輕鬆咁留得住，末段可以發揮到佢嗰段特強爆發力。「聰敏不凡」今季三戰千四米全部贏晒，雖然次次贏得險，實際上鞍上人只係睇住對手嚟食，呢次增程二百米一樣啱腳法，大家不妨繼續捧場。
|
放大圖片
