 放大圖片
雷神真係神級騎師，贏「步步友」過程，最後二百米俾人逼喺包廂，但都可以憑S形走位勝出。但到咗跑打吡替熱門馬「精彩鬥士」出戰，雖然雷神有神級騎功，但敵眾我寡，蔡約翰與高伯新，兩個馬房合共派出六駒列陣，人家打團隊戰，結果入到直路，又係俾人圍到實，蔡約翰「酷男」最幫得手，拍住「精彩鬥士」，一步都唔俾對手出，「精彩鬥士」即使有神級騎師，依然無計可施，所以每逢跑大賽，馬房出得多馬點都有着數，呢次大家可以真正見識到乜嘢叫做團隊精神，當然「戰利品」呢仗表現都犀利。講番呢場打吡大賽，蘇偉賢與容天鵬，兩位第二季當練馬師嘅倉口，可以喺打吡大賽派馬上陣，明顯指出佢哋都有番咁上下功夫仔，不過咁，蘇偉賢「精彩鬥士」屬三倍一面倒大熱門馬，與容天鵬隻「醒目名駒」，以九十九倍冷門身分列陣，兩位練馬師所懷心情絕對唔同，一個頗有寄望，另一位賽前經已打定輸數，結果抱平常心嘅容天鵬，「醒目名駒」取得一席位置，的確令人始料不到。不過，容天鵬呢次替「醒目名駒」爆冷位，又唔好話佢符碌，事關佢一早搵安國倫替呢隻馬客串，早已露出一點端倪，問題只係馬迷見九十九倍會唔會被嚇窒。今次夜賽，容天鵬隻「光輝之星」，由於騎開佢嘅杜利萊，同場有隻「福嘉皇」要騎，倉主立刻搵雷神幫手，雖然新升班，但以呢隻馬愈贏愈有嘅走勢，配合雷神，相信三班列陣，一樣無阻其取得三連捷。
|
放大圖片
