 放大圖片
今個禮拜賽事可以話戲碼十足，周六跑七場杜拜賽，越洋轉播嚟香港受注，港隊近年罕有派出七路雄師，有消息指出，港隊呢次派大軍出戰杜拜，盃就捧梗，睇吓捧幾多隻而已，消息傳來，外圍莊家一致睇好阿喬斯盃港隊三隻馬可以包攬前列，所以頭三隻外圍熱門賠率馬均是來自港隊，大熱門屬六倍「幸福指數」、次熱門屬上屆盟主「崇山寶」七點五倍，第三熱門屬「喜寶駒」八倍，呢幾隻馬被外圍莊家開得咁熱，當然睇好佢哋有唔錯嘅機會。至於另一場金莎軒泥地賽，大熱門來自美國代表「神秘集團」，只開出四倍賠率，次熱門就係香港代表「好好計」五倍，第三熱門又係美國代表「良朋致意」，第四熱門再到番香港代表「天久」十一倍。呢場外圍莊家只睇好香港同埋美國馬。另外司馬經典賽，大摩「威爾頓」被列為五倍次熱門馬，大熱門屬日本隊隻「織女星」，大家單睇賠率，就知外圍莊家幾咁睇好港隊馬，所以贏一兩場，應該屬意料中事。大摩一早過咗杜拜替「威爾頓」打點一切，講真呢隻馬所跑司馬經典賽，對大摩嚟講係別具意義，雖然上年佢終於憑隻「綽力之城」喺杜拜贏馬，但早幾年前，佢派出「爆冷」出爭司馬經典賽，在白德民胯下跑第二名，未能如願，呢次再有機會跑番司馬經典賽，並且有隻咁犀利馬「威爾頓」列陣，屆時當然希望「威爾頓」可以一圓佢嘅心願。
雖然大摩人在杜拜，但周日依然可以趕入場，時間雖緊迫，但下半場一定趕到入去，所以依然有機會督戰，今次大摩膽粗粗交隻新勝馬「共創美好」（圖10號）俾初次來港上陣年青澳洲好手連達文，大摩一向好喜歡用澳洲新秀，如貝湯美及羅達等等。「共創美好」大可成為連達文接風馬，他日佢要喺大摩度霸地盤，呢隻就係考牌馬。
|
