 放大圖片
今季莫雷拉一日贏四場，潘頓一日夾埋贏三場，以前老生常談，話馬圈愛分餅仔輪流搵食，但現今馬圈顯然唔係呢回事，如果唔係莫雷拉一個玩晒，亦一定係佢同潘頓兩個玩晒。其他人等，包括十三哥韋達，都只能吼準機會間中啄一場半場。以前亦有騎師一日贏四五場，但一季都無幾多次並非常態，但依家就一啲都唔奇。韋達近三四季先至話有啲大賽贏吓，以前佢馬雖然贏得多，但大賽就好少有佢份。但依家莫雷拉同潘頓，細賽又係佢兩個，大賽又係佢兩個，好似早前「步步友」，本身係由莫雷拉騎開，明知一定阻到隻「驌龍」要被罰停賽，佢都夾硬撬出嚟，大摩想唔錫晒佢都唔得。
潘頓喺打吡大賽贏「戰利品」（圖）就真係時來運到，首先，呢隻馬係韋達基本坐騎，蔡神仙本來跟韋達已愈來愈少合作，但「戰利品」就始終搵番韋達，但韋達就揀錯馬，或者佢因為件綵衣來作出抉擇騎「大印銀紙」，結果佢棄騎嘅「戰利品」和「直震撼」就跑出咗條打吡連贏。就算韋達唔騎「戰利品」，亦未必輪到潘頓，事關自從隻「君河」蔡神仙唔滿意潘頓無聽指示去騎，已經好耐無再俾馬潘頓跑，而在打吡大賽的其他外籍騎師已經卜定晒騎乜馬，而大賽若用華人騎師，蔡神仙又驚稍有差池就唔夠人鬥，於是唯有同潘頓破冰，潘頓冷手執個熱煎堆，真係行運行到腳趾尾！目前有兩個有趣問題：一，「戰利品」從此落入潘頓手上，抑或韋達有辦法下次攞番來騎？二，遇到與「軍事出擊」同場，潘頓又如何取捨呢？相信喺季尾嘅級際賽將會有答案。
|
