 放大圖片
■蓋鳴暉望為粵劇的傳揚出一分力。
相隔十二年，大老倌蓋鳴暉(Joyce)於無綫新劇《水髮胭脂》中粉墨登場，演當紅文武生簡潔，夥拍舊拍檔陳豪(Moses)及麥長青等上演一段包含粵劇精粹的都市情緣。Joyce直言拍劇辛苦，沒有足夠時間休息，但因為劇集題材圍繞粵劇，自己希望借此令更多市民接觸粵劇，令這個傳統文化能薪火相傳。■採訪：植毅儀/攝影：黃偉邦
陳豪與蓋鳴暉早在12年前的《金牌冰人》合作過，兩人今次再次合作，Joyce不單讚對方比以往開朗不少，更大爆已為人夫的陳豪，對太太陳茵媺及一對寶貝仔十分體貼，寧願不吃飯也要趕回家。「當初監製李艷芳搵我傾時，對手是祥仔(黎耀祥)，後來話換人，自己都有少少驚，當知道對手是Moses（陳豪），我個心就定下來。12年前同Moses合作，可能當時剛認識，當時佢cool到死，不太喜歡說話，好斯文。今次再見面，完全另一個人，現在的他開朗、抵死好多，喜歡講笑、講爛gag，臉上總掛着笑容。佢真係好好先生，有時有兩小時空檔，他寧願不吃飯都要趕回家看太太及兩個兒子，佢話唔想Aimee（陳茵媺）一個人湊住2個小朋友咁辛苦。在片場，不時給我們看他兒子的相，有愛情同家庭滋潤真係唔同晒。Moses真係好捱得，佢真係好勁，不論拍攝時間幾長，對人臉上總掛着笑容，一句怨言都沒有，抵佢紅。」
新光戲院實景拍攝
12年沒拍劇的蓋鳴暉，今次之所以參演《水髮胭脂》，只因劇集題材圍繞粵劇，而且不少實景是在新光戲院的前後台拍攝，夠真實感，可以令戲迷有機會在熒幕看她的功架，也可以借此機會將粵劇帶入屋。「拍劇其實比做大戲仲辛苦，好多時都沒有足夠時間休息。做大戲最多只是5、6個鐘，但拍劇一做就十幾個鐘。部分戲在新光戲院的前後台實景拍攝，出來夠真實感。我吊眉吊足10 多小時，又要長時間戴頭套，但為拍攝效果都是值得的。今次劇中其他對手，除了是好戲之人，還是好人。像司棋姐(李司棋)老戲骨，沒架子，她在劇中是我的經理人，和她很多對手戲。我做大戲講對白時，習慣會很大聲，司棋姐都有提點我細聲點，有時又會提醒我走位。龔嘉欣這個小妹妹，好識氹人開心，就算現在拍完劇，也會不時whatsapp我呢個『家姐』，好識關心人。今次成個劇組的人都好準時，拍了2個月就完成。」
將拍劇經驗放入舞台
蓋鳴暉在粵劇這一行算是新一代比較多人認識的大老倌之一，她主理的鳴芝聲劇團也是這一行的班霸之一。攻讀於香港八和粵劇學院，專攻文武生行當，蓋鳴暉可謂梨園中的一個異數。入行25年，蓋鳴暉吸納了一批忠實的fans，也見證了香港粵劇界的興衰。
「好多人會覺得奇怪，點解蓋鳴暉要撈過界拍電視劇，原因好簡單，因為電視劇夠入屋。所以我希望每年都拍一個劇，又或是2年拍一次，錢多與少我都唔介意。拍劇幫了我很大的忙，電視劇生活化，而且是跳拍，很短時間揣摩出不同的情緒。然後我將這些東西搬到舞台，很多觀眾都說我做的大戲有生活的味道。始終粵劇很小眾，你要買飛先可以睇。但電視唔同，一個免費的平台，令你知道蓋鳴暉這一個人，然後因為我，嘗試認識粵劇，希望粵劇這個傳統文化能薪火相傳。」
多謝李居明貼錢搞新光
蓋鳴暉作為鳴芝聲劇團的負責人，她為了伙計們的生計也無畏辛苦：「我下面有85個伙計等住我去開飯，他們多是日薪計，為了他們，大大小小的戲，只要唔虧本，我們都盡量接做。我在這行頭25年，所有事都是做足功夫，沒有辜負支持者。我對所有事都好執着，要做好榜樣，唔可以hea。我已經算是幸運的一群人，把自己的興趣成為工作之一，所以我好珍惜自己得到的東西。雖然說近年政府對粵劇的支持比以往增加了，但一個新人要在這行頭真正立足，條路依然好漫長。另外亦好多謝李居明，新光戲院若不是他出手，也難以保得住，他經營新光不單沒錢賺，每個月自己為新光補貼。」
|
放大圖片
