 放大圖片
上次喺本欄所介紹嘅「澳斯卡」，大家果然識嘢，臨場開飛「奮鬥雄心」雖然係大熱門，但跑完之後，唔知幾時「澳斯卡」變咗得番廿八蚊，呢欄講過，話明係大超班馬，排十四檔一樣行番嚟贏，由於呢隻係睇版馬，蕭家軍第一隻加盟老蔡倉嘅馬，唔打響招牌點得，呢個馬主，自己有牧場，而且好捨得使錢，邊度有好馬，佢都會不惜一擲萬金羅致，老蔡有好嘢，蕭家兵團開咗聲，一樣會同佢入貨，咁疏爽馬主，當然難求，「澳斯卡」母系馬屬蕭家軍所擁有，假如「澳斯卡」爭爭氣氣，有「戰利品」咁高成就，母憑子貴，蕭氏家族育馬事業又可豬籠入水。講開「戰利品」，一哩冠軍賽諗住可以同「步步友」撼吓，點知心律不正復發，幾經辛苦先至過到終點，照咁睇，呢隻馬都係屬孱仔一族，成就係咁上下，六月初去唔去到日本跑安田都成問題。
至於同場隻「步步友」，呢次回復最佳水準，輕輕鬆鬆袋走近八百萬頭馬獎金，呢隻馬經已準備去跑英國安妮錦標，據大摩個倉手足講，呢次去英國，倉主唔想「步步友」一隻自己去，有可能嘅話，會安排埋「新力風」一齊去跑，宜家正物色合腳法錦標，雖然「新力風」來香港兩戰都未贏過，但大摩對佢嘅表現頗為滿意，尤其啱啱呢一仗，以一三三磅得第三，假如狀態再好啲，負磅唔使讓咁多，又或者跑平磅賽，呢隻馬威力都幾驚人，所以大摩呢個如意算盤有機會打得響，預埋「新力風」一齊去英國闖天下。通常贏完大賽嘅摩插A接著夜賽都唔會點派兵上陣，搏殺意慾唔會好強，呢次夜賽一如以往，派馬少貓三兩丁，不過第四班嗰隻「獅鷲」（圖1號），出戰拿 手一哩，更一早指定用雷神披甲，呢班馬主，即上周日「再出奇」嗰班，經已好耐冇贏過頭馬，大摩必想辦法交代。
|
放大圖片
