 放大圖片
今晚谷草編跑八場，以移欄B欄C彎跑道作賽，頭場下午七時十五分開跑，三T、六環彩及第一口孖T俱有多寶，相當吸引。全晚設有兩項錦標，分別係國際商事仲裁委員會盃及蘇特恩盃。馬房方面，方嘉柏派出多匹弗馬列陣，當要重視。騎師方面，潘頓及雷神皆值得留意動向。
第一場、第四班、一六五○米。「友瑩養」（圖5號）葉楚航馬房四歲中距離分子，季內五戰，跑到季中撻着車頭，先在前仗競逐谷草一哩，喺薛寶力胯下追入大冷第四名；上仗改配郭能再爭此程，結果喺能哥胯下追足一條直路，抽打十幾鞭打到開花都係僅負俾有班底嘅「神奇飛龍」，拚後官仔馬狀態續進，而今再爭谷草一哩，對手並非太強，交出水準有力贏馬交代。
彩耀全球一放絕塵
第二場、第四班､一○○○米。「彩耀全球」四歲早熟快馬，季初評五十二分初出跑田草千二即一鳴驚人，喺蘇狄雄胯下搶放爆出十三倍冷W，惟勝後跑過兩仗表現平平未見佳處，至於今次轉跑谷草千二雖無賽績支持，惟埋門兩周馬房操練工夫一絲不苟，由狄仔一手打磨狀態磨利刀，以本身跑法夠主動，料甚合窄場發揮，放出有力言勝。
第三場、第四班、一六五○米。「為食仔」五歲英國中短途馬，季內初出跑過七場，前仗角逐谷草一哩跑第四表現接近；上仗改配柏兆雷執韁出爭田草一哩，排十三檔起步半程殿後，入直路兜出三疊望空打衝鋒力追入Q，拚後打仔馬狀態更勇，今次馬房安排渡江復爭一哩，對手非強可叩響勝門。
第四場、第五班、一○○○米。「創意寶」四歲仔喺五班作賽必有討價還價之力，看最近三戰五班短途賽事，當中兩戰谷草一千取得一亞軍，該役力鬥「年年好運」僅負馬頸位，而今次抖近一個月養足體力再爭谷草一千米，埋門出試走來成熟躍進不少，可望今仗取得勝仗向幕後交代。
第五場、第四班、一二○○米。「快人一步」六歲仔季內跑過八仗，慢熱馬由於評分偏高，喺三班接戰欠缺表現，直到上賽降回四班出爭谷草千二卒有反彈演出，喺柏寶胯下後追力拚入Q，只負「特務飛龍」半馬位非戰之罪。而今練者入紙再爭拿手途程，且看可否趁勇衝擊季內首W。
第六場、第三班、一二○○米。「紅海灣」四歲T布馬季內四戰，當中頭三戰出爭谷草及泥地千二米皆跟跑而回，到上仗再爭谷草千二，練者替牠加眼罩作賽，翻查隻馬來港前就係戴眼罩下贏馬，結果表現脫胎換骨，在田泰安胯下後上衝贏「伽楠」打開勝門，今仗仍留三班作賽續攻贏馬路程，交出上回凌厲後勁有力添食。
第七場、第三班、一○○○米。「皇子」體弱卻有高質素之馬，上年曾經兩次試閘後流鼻血，唔計上場，來港已兩年只跑過兩次，曾陷出局之危險邊沿，然而經過練者悉心打理之下，上回久休五個月復出渡江跑谷草一千米，結果在雷神胯下起步應聲彈出，就此貼欄一放到底，拉士按韁贏三個幾馬位返嚟，今回升班孭輕磅，有力打疊再贏。
馬飛龍連捷無阻力
第八場、第三班､一六五○米。「馬飛龍」五歲意大利馬，雖然喺上仗之前跑過十五仗只係得一席季軍，不過話晒此駒來港前曾在羅馬勝出三級賽一哩及跑過意大利打吡，睇番上場初次降入四班出爭谷草一哩，柏寶轉彎踩油即拋離「紫電明珠」兩個馬位，輕鬆打開勝門，而今升班改負輕磅再爭此程，當有捧場價值。
|
放大圖片
