 放大圖片
估唔到喺○五至○六年度由韋達所締造一季贏一一四場嘅頭馬紀錄，雷神騎第二季就經已好快咁平咗，啱啱所跑完嘅夜賽，雷神憑「豁達瀟灑」、「為食仔」及「創意寶」連中三元，後兩隻仲係處女馬，呢個環境，雷神所騎之實力馬，實在時刻都有留意必要。當然現階段，五月份都未跑完，經已贏一一四場頭馬，平咗紀錄，馬季仲有成兩個月，要破韋達舊紀錄，同埋破幾遠，真係要睇雷神嘅表現，粗略計數，俾佢多贏二、三十場一定唔難，只係視乎雷神點樣發力。今個禮拜日，雷神將會返新加坡跑新航盃，呢次佢唔會策騎香港馬上陣，事關兩場級際賽，主隊有惡馬等緊佢，新航國際短途錦標嗰場，有隻「傑精神」俾佢跑，另外新航盃呢場，又有隻「尊尼吉他」上陣，能夠令到雷神唔騎港隊馬而騎番星洲主隊馬，一定有番咁上下實力，大家不妨留意吓。
臨起行之前，莫雷拉當然希望執番幾Ｗ壯行色，呢次蔡約翰馬房，準備咗唔少實力馬由佢披甲，例如一出即勝隻「華恩庭」（圖5號），上次一出即贏田草千二米，但呢場並唔係由雷神操刀，蔡約翰有心關照韋紀力，後者蔡神仙好器重佢，每次嚟香港，大家不妨留意吓，呢個馬房必有馬俾佢上陣，且多數有實力，「華恩庭」明係俾韋紀力搵水腳，呢次冇韋紀力喺度，當然交番俾雷神出戰，正頭正路咁部署。
本來「華恩庭」贏完之後，好快有機會跑第二次，所報路程亦係今次所跑嘅田草千四米，但因為排位後發覺有微燒現象，所以要退下火線治療，大家咪以為發燒一定係好大件事，假如微燒嘅話，治療得及時，呢類病徵好快就復元，慶幸「華恩庭」早被發現，亦能及早治療，所以並唔係乜嘢大件事，最近馬匹恢復正常操練，試大閘亦輕鬆掄元，今場絕對有再贏機會。
|
放大圖片
