 放大圖片
大摩與蔡神仙，兩位澳洲籍練馬師，大摩以五十四場排頭位，蔡神以四十九場排第三，雖然兩位練馬師同聲同氣，但跑到季尾階段，似乎大家都朝住個冠軍練馬師寶座進發。大家細心睇睇上個禮拜，大摩擺明想擸晒兩個錦標，點知遮打盃失手，好彩有莫雷拉「新力風」擸番個沙田銀瓶。蔡約翰呢方面，「首飾多寶」搵蘇狄雄建功，睇睇小伙子末段鍊贏巫斯義「福勵」，贏馬定贏人，要蔡約翰至知，但呢位華將愈來愈受蔡神仙重用，贏「首飾多寶」前，對上一個夜賽，經已替蔡廄贏「川河猛駒」。講番蘇狄雄贏「首飾多寶」，同場雷神騎隻蔡廄「鈦金剛」竟是吶喊助威之輩，諗落呢個安排，未必唔係蔡約翰刻意之作。
當然，亦有見過蔡約翰喺好多場合即使無雷神幫手，蔡神亦都會膽粗粗，連雷神呢關亦想硬闖，就如剛周日「活力寶」作例，明知同場有「包裝奔馳」由雷神壓陣，十個馬迷有九個都金睛火眼睇到實，唯獨臨場一匹「活力寶」票如雨下，如果唔係雷神起步醒目，排十四檔「包裝奔馳」一早搶出，然後再收慢搵遮擋，如果唔係，呢席頭馬經已俾蔡神仙偷雞成功，換句說話，蔡約翰現今搏馬連雷神亦無面俾，近呢個月賽事，大家不妨多加留意蔡廄馬匹，分分鐘經已鎖定目標，直迫大摩榜首位置。
以今次戰馬為例，據蔡廄手足消息所得，上個星期有三駒賽前作過針藥催俗，呢三隻馬分別屬「紅衣前進」、「皇子」及「川河首駒」。所以屆時呢個馬房郁手出擊馬，呢三隻必定係先頭部隊。
先講第六場出戰三班一千米隻「皇子」，前仗於四班贏呢個路程，姿態輕鬆好似大把喺手，但上到三班，即刻唔夠揮，其實非也，大家睇一睇上次「皇子」點樣跑，起步雖然唔係最快，但速度都唔錯，第一隻彈出係「滿貫豐采」，跟住「皇子」同「奧妙繽紛」就一齊拍實，諗住跟牢前面隻馬，可惜就因為頭段步速非常之快，「滿貫豐采」放到終點前腳軟得第四名，「皇子」咪以為佢輸遠，佢亦得第五名，相反，一齊同「皇子」拍實嗰隻「奧妙繽紛」，連影都無埋，所以，「皇子」適應咗三班超快步速後，今次大可發揮出真正水準爭勝。
紅衣前進綁脷爭功
出戰第三場四班一千米之「紅衣前進」，排位朝蔡約翰猛咁提點副練羅富全要替呢隻馬入紙綁脷，呢個建議純粹係雷神提出，事關呢隻馬到目前為止經已有三次得季軍成績，每次跑入位置，呢隻馬總是末段姍姍來遲，當然，要迫起呢隻馬前速，馬房非要動多少心思不可，今次綁脷就係針對呢一點，現時雷神停賽，用田泰安騎一樣夠實力爭勝，不妨留意。
川河首駒捲土再來
「川河猛駒」上次本配莫雷拉出擊，臨時換上蘇狄雄依然贏得出色，今次同主「川河首駒」列陣，無雷神當然搵番蘇狄雄幫手，呢一個就係替工演出好嘅意外收穫。「川河首駒」上場跑田草千六米並非所長，敗績不能作準，今次跑番谷賽一哩，只要交番前仗輸俾「喜寶寶」一戰水準，係有爭勝機會。
|
放大圖片
