 放大圖片
■克勤(右)讚祖兒(中)為人爽直。
香港文匯報訊 容祖兒（Joey）及李克勤日前齊齊作客TVB娛樂新聞台節目《StarTalk》接受專訪，大談二人合作開騷及成為好友趣事。
現年35歲的Joey大爆早在12、13歲時跟克勤有一面之緣，她說：「當時我在清水灣電視城，抱住戰戰兢兢的心情去問克勤合照，發現佢真人同喺電視係無分別，完全唔高傲，所以印象分大增，到現在熟咗，佢工作同私下也會顧埋我感受，好窩心！」克勤表示Joey是一個爽直的女仔，他說：「好記得十多年前一個音樂頒獎禮上，Joey無啦啦問我佢個妝得唔得，女仔化妝咁私人的問題我點識，而且我哋當時又唔熟，喺我眼中女仔係冇咁直接，有些扭擰，但Joey就比較少。」Joey笑說：「其實我想問我牙縫有冇條菜喺度，而佢太太盧淑儀又咁靚，佢一定有研究，一定知道咩叫靚。」
克勤又大讚Joey入得廚房，他說：「生命中我只係畀過兩個人入我屋企煮飯，一個係黃淑儀（Gigi姐），另一個就容祖兒，佢同Gigi姐個Level係一樣，連汪明荃食過都大讚好食，不過唔知點解上次佢搞咗幾個鐘先煮到啲嘢出來。」
提到下一個十年，克勤表示以往會有好多計劃，但未必能夠完成，所以現在的計劃也不是太長遠，他說：「現在我哋比較多廣東歌，希望之後可以同Joey用國語歌走巡迴，好似同校長咁繼續做落去。」而Joey則希望同克勤一家大細去旅行，被問到自己是否都想一家大細先？Joey以笑避談話題，表示克勤會照顧自己，她說：「我好鍾意佢啲囝囝！」克勤笑說：「我都好鍾意妳啲仔（暗示Joey男友劉浩龍）！」全場爆笑！
|
放大圖片
