 放大圖片
■陳家樂認為接受挑戰能令自己成長。
英皇電影《破風》將於本周四上映，演員之一的陳家樂為了此片秘密特訓半年，日日騎單車練習，可惜出師不利，在第一場戲就意外受傷，導致鎖骨斷裂，一度面臨換角危機。最後，家樂憑心中一份堅持，重回拍攝隊伍，完成電影，連導演林超賢亦大讚他專業。■採訪、攝影：植毅儀／場地： Life Cycle／髮型：Kenrick Siu @TheAttic／化妝：Yannes Lee(ND&CO)／服裝：CHOCOOLATE @ I.T／鞋： adidas HK
入行8年，陳家樂拍攝的多是愛情電影，去年被金像獎導演林超賢睇中，與知名台星彭于晏、內地演員竇驍及韓星崔始源合作，齊齊在《破風》一片做單車手飾演要角，走訪世界各地取景，拍攝單車比賽場面。可惜家樂出師不利，在台中拍攝第一日因踩單車炒車而嚴重受傷入院。「拍攝第一日，導演林超賢喊action，自己已經好投入，因為身邊一齊拍攝的都是國家隊單車手，一落場就進入比賽狀態，大家都好認真，好投入。人人都爭着衝線，我的技術卻未去到他們的層次，單車爆胎失平衡，便受傷了。當時沒想過會受傷，唔識保護自己。」
炒車一刻，陳家樂形容這世人都未遇到過這樣的畫面。發生意外，陳家樂被馬上送院，醫生檢驗證實左邊膊頭斷骨，需要進行手術，醫生更建議停工半年醫治。後來知道有可能要換人，家樂心情激動，便親自致電給監製，希望對方給予機會。
回想意外發生時，陳家樂仍然印象深刻。他說：「炒車後，當下唔知自己已經受傷，仲想起身，但郁唔到，然後成班人衝埋來我身邊。醫生卻說鎖骨斷裂，需要休息半年，不可以再拍下去。收到換角消息，當場爆喊，諗咗一晚，到第二日我打畀監製同佢講：『如果我踩唔到單車，你換角，我明白，但希望你畀個機會我，我覺得自己可以踩。』因為準備咗大半年，如果一個鏡頭都完成唔到，自己好唔甘心，而且咁大製作，自己真係好想參與。兩星期後，我瞞着家人，自拍一段踩單車的片段畀導演睇，對佢講我仲上到車，希望他畀個機會我。好多謝導演畀我參與一個香港的場口，埋位前又聽到有人受傷，但我不停自我催眠『陳家樂你是可以的』，踩完後全場歡呼拍掌，我開心到喊咗出來，因為我戰勝咗自己！」
經此一役 無所畏懼
令陳家樂咬緊牙關捱下去的，除了想在哪兒跌低就在哪兒爬返起身外，還有一班戰友的支持。繼他首日拍攝炒車跌倒斷鎖骨後，家樂之後又再次受傷，令劇組大為緊張，幸好這次只是皮外傷。不過，他慶幸因受傷而感受到身邊人的關心，就連老闆楊受成亦很關心他，令他受寵若驚。
陳家樂表示：「楊生話拍呢套戲好多人受傷，好彩最後沒事，亦開心我可以完成呢套戲。為了呢套戲，我們做了很多前期的準備工夫，連續14日朝9晚8地行山。我本身平衡力較差，好努力去鍛煉。之後我們做滾筒式單車訓練，相當考驗平衡力，彭于晏一晚已經做到教練要求，我用了7日。因為彭于晏做到，我就逼自己，唔想被對方拋離太遠。之後去沙漠拍攝，好凍，自己又出師不利，唔見咗行李，晚上零下十度，只好周圍問人借衫。經此一役，現在咩都唔驚，因為挑戰令自己成長，唔捱過唔知自己原來係得。因為當初都被導演個名嚇倒，連老闆都叫我小心，佢話導演係魔鬼。但其實導演好有義氣，佢會日日陪我們騎單車，叫我加油。」
|
放大圖片
