 放大圖片
■王浩信坦言為了愛女，甘願為「奴」。
王浩信（Vincent）加入無綫七年，演過無數次二世祖及屢被兜巴星後，在近日播出的劇集《樓奴》首度擔正第一男主角。劇集中，浩信為層樓負債纍纍，播出後引起不少人共鳴。現實中的他雖未升呢成業主，但浩信坦言為了愛女，甘願為「奴」，正積極為儲買樓首期而努力。■採訪、攝影：植毅儀
無綫劇集《樓奴》平均收視25、26點，相當不錯。王浩信在劇中首次擔正做男主角，事前承受不小壓力，現在收視及口碑都有不俗成績，可令Vincent鬆一口氣。「我覺得這個『BB』好正，題材又難得，相信香港人會有共鳴。不過始於是自己首次擔任男主角，所以自己的心情都緊張，感到頗大壓力。拍檔李施嬅獲悉後也有傳短訊安慰，佢叫我放鬆啲，唔使太大壓力。其實大家除咗睇我，仲可以睇香香(岑麗香)同李施嬅呢2位女神，特別是施嬅，佢做惡租客做得好癲、好放。」
劇中王浩信為層樓欠債纍纍，但現實中的他未升呢業主，仍為首期而努力！一向租開樓住，本來沒意入市，但考慮到女兒王靖喬開始長大，為令這個小公主有個安樂窩，王浩信努力儲首期，希望來緊有機會「上車」成業主。「說起來我比角色仲慘，我連做『樓奴』都未達標，仲努力儲緊首期。目標是在現在住緊嗰區找個安樂窩，500、600呎，上咗車先。以前我同YOYO(陳自瑤)沒想過買樓，但隨着阿女長大，依家真係覺得好必要。」
多謝公司不停畀機會
過往同王浩信做專訪，言語間他曾經好苦惱自己是否太早結婚生BB，怕流失了部分fans。但隨着林峯、吳卓羲相繼離巢唔續約，決心返內地搵真銀，TVB鬧小生荒。相反有家室的王浩信成為力捧對象之一，除了《樓奴》是男主角外，剛拍畢的《EU超時任務》，他照樣是男主角，難怪他賣口乖，話不會回內地拍劇。
「以前自己都驚結咗婚就會定咗型，但自從有咗個女，自己個心反而多咗個努力的目標，要畀一個舒服的家老婆同個女。我入行10年，好好彩份工已經係我夢想，我省卻咗別人最痛苦的過程。而且早已習慣由低做起，未有飄飄然，也很多謝公司對我的信任。雖然好多人話搵內地工作搵錢比香港多，但在香港慢慢做，也有不少機會，我由七線角色到𠵱家一線，真係好感恩機會多咗。」
重視觀眾反應多於獎項
王浩信有個別名叫「兜巴信」，事緣當日在《名媛望族》中被謝雪心(心姐)連摑23巴後，因而得此名。近年王浩信的演出都令人眼前一亮，像早前《名媛望族》的「鍾啟燁」，《法外風雲》的「宋家耀」，《再戰明天》的「喬正橋」，今次《樓奴》的「樓耀明」，甚至剛拍畢的《EU超時任務》，其角色都好搶鏡。難怪早前傳出TVB提早播出《樓奴》，是為王浩信年底提名頒獎禮男主角鋪路。「真係唔知有調動過，通常是劇集出街前一個月才收到通知叫宣傳就幫手。至於增加候選人，我就更加唔清楚。不過，如果我年尾有份角逐視帝，就當作拿獎，要Book定餐廳慶祝。其實作為演員，每次拍劇自己都有花心思去研究每個角色，好感恩有好角色和題材去發揮。講真，以前初入行，自己簽咗間大唱片公司，前呼後擁好多同事幫我，感覺飄飄然。那時像坐升降機上高位，現在我喜歡腳踏實地行樓梯。命運待我唔錯，算係有運行。但我緊張觀眾反應多於獎項，觀眾認同我做得好先算數。」
|
放大圖片
