備戰檢閱：盈利駿馬泥地煞食

放大圖片

練馬師容天鵬剛季頭馬稍減至三十場，慶幸仍有不少支持者，目前養馬多達五十多匹並且接近爆倉階段，展望新季開倉第三個年頭，頭馬數字可企穩卅場以上。數容天鵬令馬迷最深刻的印象，應是陣上搏殺作風鮮明，而且越熱越穩陣，睇番前季容廄大熱門交出二十勝十六位，僅七匹不入三甲，不單佔馬房總頭馬超過一半，而且上名率高逾八成，是各馬房之冠。至於剛季，全季有三十七匹大熱門取得九勝十六位，勝出率及上名率雖不及首季，但仍保持不俗數字，證明容廄馬只要票數勁已值得投下信心一票。容天鵬馬房上季分了幾段搏殺期，首輪在十二月份，該月內共贏了四場頭馬，到了二月再次搏殺，在該月短短時間內贏六場，到了四至五月兩個月內僅取得一場，直至季尾再次發動攻勢，六月至煞科的個半月內共贏了七場。

用人方面，觀看容廄卅場頭馬只得三場係由華籍騎師操刀，一眾外籍大師傅之中最倚重潘頓，兩人攜手贏了十二場，除了「傲飛星」爆十五倍外，其餘十一匹頭馬全是七倍或以下，其中大熱及次熱佔了三匹及五匹，可見潘頓出策容廄熱門馬絕對信得過，廄內前景最佳馬首推「盈利駿馬」（圖前駒），贏馬一仗挫強敵更締佳速，年紀輕兼里程新，新季一心一意專攻泥地，料起碼兩場頭馬在手。