湯文亮家訓 對人「客氣」

紀惠集團行政總裁湯文亮一篇「細價樓爆煲論」，紅遍大江南北，昨日其仔女同場代表集公司出場，少不免成為傳媒採訪焦點。問到昨日招租的文麗樓時，湯振玲取笑父親說：「文麗樓其實係湯文亮同我媽咪個名併埋，好明顯我阿爸真係好錫老婆啦。」

湯振玲昨又鬼馬分享公司的「家訓」，最重要兩個字是「客氣」：「租客是衣食父母，一定不能給他們機會話我哋係無良業主，因為無租客我哋業主好難生存。第二，代理幫我哋搵食，係我哋最好的朋友，我哋以禮相待，阿爸呢期的教訓是，同代理食飯一定要爭俾錢，因為係佢哋俾機會我哋請食飯，對銀行、對代理、對租客都要客氣。」

湯振玲與哥哥湯振傑感情相當好，湯振玲坦言昨日是專程到記者會「撐場」。湯振玲透露，她2008年加入公司，哥哥則於第一太平戴維斯工作10年，最近才剛加入公司，昨日第一次代表紀惠集團見傳媒。

湯振玲稱兄長負責「打大仗」

問到對哥哥昨日表現的評價，她連聲稱讚，不斷說「學到嘢」，指買賣是其強項，自己都要向其請教，又指自己與哥哥負責層面唔一樣：「佢打大仗，我睇後防，多啲處理按揭，與銀行打好關係，守住大後方，讓佢可以放心打仗。」 ■記者 顏倫樂