孖寶我有計：威百利檔靚贏得

放大圖片

今晚谷草賽事採用B欄C彎進行，到底對放頭馬還是後上馬較為有利，真係要跑過才有答案，但選馬當然以曾於谷賽有過好表現之馬較為秤先，始終谷草性能出色，在此類賽事之中無往而不利，命中機會亦較高。

第一場五班千二米，「威百利」上季尾曾兩捷於同程，擺明係五班頂分子，埋門何澤堯頻頻親自拍跳準備認真，今仗抽到內檔起步形勢有利，必不會無的放矢。「元豐泰」經上季全力減分，現時評分處於新低點，甚至比前季兩捷時更低分得多，今仗用到韋達執韁戰意鮮明，力足低位反彈。

第二場四班千二米，「歡喜」上季轉投告廄後，除初出一役外，其後四仗取三冠一亞，真正實力仍未見底，今仗原班再戰勝途，亦繼續交由贏馬拍檔韋達執韁，有權爭取跨季三連勝。「好事必得」近三季初出取得冠亞殿軍各一，埋門試埋大閘才跑今仗，準備工夫做足，必拚盡求取勝仗，冷門之選。